Անշաքար թեյ խմելը կապված է բոլոր պատճառներից, ինչպես նաև քաղցկեղից և սրտանոթային հիվանդություններից մահվան ռիսկի զգալի նվազման հետ: Սակայն շաքարով կամ քաղցրացուցիչներով թեյը նման ազդեցություն չունի: Սա ցույց է տվել Frontiers in Nutrition ամսագրում հրապարակված ուսումնասիրությունը։
Ուսումնասիրությանը մասնակցել են 37-ից 73 տարեկան 195,361 կամավորներ: Անբավարար առողջական տվյալներ ունեցող մարդիկ, հղի կանայք և նրանք, որոնց էներգիայի ընդունումը զգալիորեն շեղվել է նորմայից, բացառվել են վերլուծությունից: Նմուշում ներառվել են միայն նրանք, ովքեր առնվազն մեկ անգամ լրացրել են 24-ժամյա առցանց սննդի օրագիր:
Ուսումնասիրության հեղինակները համեմատել են երեք տեսակի թեյի՝ անշաքար, շաքարով և արհեստական քաղցրացուցիչներով թեյի ազդեցությունը ընդհանուր և տեսակարար մահացության վրա: Հիմնական ուշադրությունը սև թեյի վրա էր, որն ամենահաճախ օգտագործվում էր ուսումնասիրության մասնակիցների կողմից։
Պարզվել է, որ նրանք, ովքեր օրական խմում էին 3.5-4.5 բաժակ թեյ, ունեին բոլոր պատճառներից մահվան 20%-ով, սրտանոթային հիվանդություններից՝ 27%-ով և քաղցկեղից՝ 14%-ով ցածր ռիսկ։ Այս ազդեցությունը կախված չէր կոֆեինի նյութափոխանակության գենետիկական առանձնահատկություններից։ Միևնույն ժամանակ, շաքարով կամ քաղցրացուցիչներով ըմպելիքը պաշտպանիչ ազդեցություն չէր ցուցաբերում։
Նշվում է, որ քաղցրացված թեյի սպառողներն ավելի հաճախ տղամարդիկ էին, ավելի քիչ էին մրգեր ուտում և ընդհանուր առմամբ վարում էին ոչ այնքան առողջ ապրելակերպ. նրանք ծխում էին, տառապում էին ավելորդ քաշից, հիպերտոնիայից և քրոնիկ հիվանդություններից։
Թարգմանությունը՝ Euromedia24.com-ի
