ԱՄՆ գործող նախագահ Ջո Բայդենը և նորընտիր նախագահ Դոնալդ Թրամփը նոյեմբերի 13-ին Սպիտակ տան Օվալաձև աշխատասենյակում կայացած հանդիպման ժամանակ քննարկել են Գազայի հատվածում պատանդների խնդիրը և հայտնել իրենց մտադրությունը՝ լուծել խնդիրը մինչև 2025 թվականի հունվարի 20-ը։
Այս մասին հայտնում է Axios պորտալը՝ հղում անելով աղբյուրներին։ Նույն օրը Բայդենը հանդիպել է պաղեստինյան արմատական ՀԱՄԱՍ շարժման ամերիկացի պատանդների ընտանիքների հետ։ Պորտալի զրուցակցի խոսքով՝ պետության ներկայիս ղեկավարը քաղաքացիներին ասել է, որ ինքը և Թրամփը համակարծիք են, որ պատանդների խնդիրը հրատապ է, և որ նրանք ցանկանում են փորձել լուծել այն մինչև հանրապետականի երդմնակալությունը։ Բացի այդ, Բայդենը խնդրել է Թրամփին օգնել իրեն ՀԱՄԱՍ-ի պատանդների ազատ արձակման և Գազայի հատվածում հրադադարի համաձայնագրի հարցում։
Պորտալը գրում է, որ դեմոկրատը ցանկանում է օգտագործել իր պաշտոնավարման երկու ամիսը գործարքի շուրջ «բանակցությունների ձգձգվող փակուղին» հաղթահարելու համար, մինչդեռ հանրապետականը, հավանաբար, կցանկանար ավելի քիչ ճգնաժամեր տեսնել մինչև հունվարի 20-ը։
