Նիգերիայի վեց քաղաքացիներ, որոնց մեղադրում են հանցավոր ցանցին մասնակցելու մեջ, որը ռոմանտիկ առցանց ծանոթությունների միջոցով ավելի քան 100 ամերիկացի կանանցից շորթել է ավելի քան 6 մլն դոլար, արտահանձնվում են Հարավային Աֆրիկայից ԱՄՆ, հայտնել է CBS News-ը։
Իրավապահների վարկածով՝ միջազգային Black Axe հանցավոր կազմակերպության հետ կապ ունեցող տղամարդիկ ձերբակալվել էին դեռ 2021 թվականին Քեյփթաունում։ Ուրբաթ նրանց կհանձնեն ԱՄՆ Հետաքննությունների դաշնային բյուրոյի (FBI) և ԱՄՆ Գաղտնի ծառայության ներկայացուցիչներին, որից հետո կտեղափոխեն Միացյալ Նահանգներ։ Այնտեղ նրանց մեղադրանք կառաջադրվի էլեկտրոնային կապի միջոցների օգտագործմամբ խարդախության և փողերի լվացման համար։
Ոստիկանության տվյալներով՝ չարագործները համացանցում ծանոթանում էին ամերիկացի կանանց հետ և նրանց հետ երկարատև ռոմանտիկ հարաբերություններ էին կառուցում։ Ենթադրյալ զոհերի թվում եղել են թոշակառու կանայք և գործարարներ։ Ստանալով կանանց վստահությունը՝ հանցագործները, ինչպես պնդվում է, համոզել են նրանց գումար փոխանցել։
Հարավաֆրիկյան ոստիկանությունը կարծում է, որ այս վեց տղամարդիկ նիգերիական հանցավոր ցանցի՝ Black Axe-ի մասնակիցներ են, որը Ինտերպոլը կապում է ամբողջ աշխարհում ֆինանսական բնույթի կիբեռհանցագործությունների զգալի մասի հետ։ Կազմակերպությունը, մասնավորապես, առնչվում է ռոմանտիկ և ներդրումային խարդախություններին, ինչպես նաև կրիպտոարժույթների օգտագործմամբ հանցագործություններին։
Ուրբաթ տղամարդկանց Քեյփթաունի ուղղիչ հիմնարկից տեղափոխել են միջազգային օդանավակայան, որտեղ նրանց հանձնել են ամերիկացի իրավապահներին։ Հարավային Աֆրիկայի ոստիկանության ներկայացուցիչ Կատլեգու Մոգալեն հայտնել է, որ արտահանձնման համակարգմամբ զբաղվել է Ինտերպոլը։
Սա առաջին դեպքը չէ, երբ Black Axe-ի ենթադրյալ ղեկավարին փոխանցում են ամերիկյան իշխանություններին։ Մոտ երկու տարի առաջ ԱՄՆ արտահանձնվեց կազմակերպության աչքի ընկնող առաջնորդներից մեկը, որին մեղադրեցին ինտերնետ-խարդախություն իրականացնելու նպատակով դավադրության և փողերի լվացման մեջ։
Միջազգային իրավապահ մարմինները վերջին շրջանում ուժեղացրել են պայքարը արևմտաաֆրիկյան հանցավոր ցանցերի դեմ։ Ինտերպոլի վերջերս անցկացրած գործողության ընթացքում ձերբակալվել է 58 մարդ, պարզվել են տարբեր հանցավոր խմբավորումների հետ կապված 263 կասկածյալի ինքնությունները։ Հարավային Աֆրիկայում ոստիկանությունը Յոհանեսբուրգում իրականացրել է յոթ խուզարկություն, որտեղ գործում էր ցանց, որը զբաղվում էր ռոմանտիկ և ներդրումային խարդախություններով անգլիախոս երկրների բնակիչների, առաջին հերթին թոշակառուների դեմ։ Այդ ժամանակ ձերբակալվել է 39 մարդ, առգրավվել 2,67 մլն դոլար, սառեցվել ավելի քան 250 բանկային հաշիվ։
Խնդրի մասշտաբը ԱՄՆ-ում շարունակում է զգալի մնալ։ Առևտրի դաշնային հանձնաժողովի տվյալներով՝ 2023 թվականին ռոմանտիկ խարդախների զոհ են դարձել ավելի քան 64 հազար ամերիկացիներ, որոնք ընդհանուր առմամբ կորցրել են ավելի քան 1 մլրդ դոլար։ Չորս տարվա ընթացքում նման կորուստների ծավալը մոտավորապես կրկնապատկվել է։
