Կանադայում կայացած «Յոթի խմբի» (G7) գագաթնաժողովի շրջանակներում ԱՄՆ նախագահ Դոնալդ Թրամփի հետ անհաջող հանդիպումից հետո Վլադիմիր Զելենսկին հույս ունի նրա հետ խոսել ՆԱՏՕ-ի առաջնորդների՝ Հաագայում կայանալիք հանդիպման ժամանակ։
«Այո՛, ես պատրաստվում եմ», - ասել է Զելենսկին Sky News-ին տված հարցազրույցում՝ պատասխանելով այն հարցին, թե արդյոք նա ակնկալում է հանդիպել Թրամփի հետ դաշինքի առաջիկա գագաթնաժողովում։
«Ես չգիտեմ, թե ինչ կլինի, թիմերն աշխատում են, մենք պատրաստվում ենք հանդիպել»,-ասել է նա։
Նա խուսափել է պատասխանել այն հարցին, թե արդյոք լուրջ բանակցություններ են նախապատրաստվում բովանդակային քննարկման համար, թե՞ պարզապես զրույց, ասելով, որ այժմ քննարկումը վերաբերում է ամերիկացի առաջնորդի հետ հնարավոր հանդիպման ժամանակին։
Թրամփը հունիսի 16-ին G7 գագաթնաժողովից հեռացավ նախատեսվածից շուտ։ Սպիտակ տունը բացատրեց, որ նա «շատ կարևոր հարցեր ունի լուծելու»։ Սակայն, ավելի ուշ, Financial Times-ը հայտնել էր, որ պատճառը Ֆրանսիայի նախագահ Էմանուել Մակրոնի նկատմամբ դժգոհությունն ու Զելենսկիի հետ հանդիպելու հետաքրքրության բացակայությունն էր։
