Ֆրանսիան կարող է միջուկային հզորությամբ ինքնաթիռներ տեղակայել Գերմանիայում, եթե Միացյալ Նահանգները որոշի դուրս բերել ամերիկյան զորքերը Եվրոպայից։ Այս մասին գրում է Daily Telegraph թերթը՝ վկայակոչելով աղբյուրները։
Ինչպես նշել է ֆրանսիացի անանուն պաշտոնյան, դժվար չէ Գերմանիայի տարածքում միջուկային զենք կրող մի քանի ֆրանսիական կործանիչներ տեղակայել։ Նրա խոսքով՝ դա կարող է «լուրջ ազդանշան» լինել Ռուսաստանի համար։
Գերմանացի դիվանագետները, ովքեր ցանկացել են անհայտ մնալ, իրենց հերթին նշել են, որ Ֆրանսիայի իշխանությունների նման քայլը կարող է բրիտանական ղեկավարությանը դրդել հետևել նրանց օրինակին։
Հրատարակությունը հավելում է, որ CDU/CSU դաշինքից Գերմանիայի կանցլերի թեկնածու, կառավարության հավանական ապագա ղեկավար Ֆրիդրիխ Մերցը, ով հանդես է գալիս ԱՄՆ-ից Եվրոպայի «անկախության» հասնելու օգտին, Մեծ Բրիտանիային և Ֆրանսիային կոչ է անում ընդլայնել իրենց միջուկային զինանոցի օգտագործումը տարածաշրջանի պաշտպանության համար։
