Երևանի քաղաքապետարանն այս տարի ժամանակից շուտ է ապամոնտաժել Հանրապետության հրապարակի գլխավոր տոնածառը, ինչն առաջացրել է քաղաքացիների դժգոհությունը, քանի որ նախորդ տարիներին տոնածառը մնում էր մինչև հին Նոր տարի՝ հունվարի 14-ը։
Թե ինչով է պայմանավորված այս հանագամանքը Euromedia24-ը ճշտեց Երևանի քաղաքապետի մամուլի քարտուղար Հայկ Կոստանյանից։
«Քանի որ տոնածառի լույսերի վառման արարողությունը, քաղաքի ամանորյա լուսավորությունը նախորդ տարի դեկտեմբերի 8-ից է մեկնարկել, դրանով պայմանավորված այս տարի ավելի վաղ են տոնածառը հավաքում, ինչպես նաև ամանորյա լուսավորումը։
Փաստացի 1 ամիս թե տոնածառի լույսերը, թե քաղաքի ամանորյա լուսավորությունը միացված է եղել»,- ի պատասխան մեր հարցի ասաց Հայկ Կոստանյանը։
Նկատենք, որ նախորդ տարիներին Հրապարակի գլխավոր տոնածառի լույսերը վառվել էին դեկտեմբերի 19-ին, իսկ այն ապամոնտաժվել էր հին Նոր տարուց հետո։
Սոնա Հարությունյան
