Առնվազն 60 ուղղափառ քրիստոնյա է զոհվել Եթովպիայի Օրոմիա շրջանում տեղի ունեցած երկու հարձակումների հետևանքով։ Ողբերգության մասին հայտարարել է Եթովպական ուղղափառ Տևահեդո եկեղեցին՝ իշխանություններին կոչ անելով պաշտպանել խաղաղ բնակիչներին և պատասխանատվության ենթարկել մեղավորներին, հայտնում է Associated Press-ը։
Եկեղեցու Սուրբ սինոդի տվյալներով՝ հոկտեմբերի 20-ին Մերտի շրջանում սպանվել է 14 մարդ, իսկ հոկտեմբերի 24-ին Շիրկա շրջանում զոհվել է ևս 46 մարդ։ Երկու շրջաններն էլ գտնվում են Օրոմիայի տարածաշրջանի Արսի գոտում։
Եվս ավելի քան 20 մարդ ստացել է ծանր վիրավորումներ, իսկ 20 բնակելի տուն այրվել է։ Եկեղեցում տեղի ունեցածը «դաժան և անողոք զանգվածային սպանություններ» են բնութագրել և հայտարարել, որ հարձակումները խախտում են դավանանքի ազատության և կյանքի իրավունքի սահմանադրական երաշխիքները։ Եկեղեցական ղեկավարությունն իշխանություններից պահանջել է հրապարակայնորեն դատապարտել հանցագործությունները և միջոցներ ձեռնարկել հետագա բռնությունները կանխելու համար։
Օրոմիայի տարածաշրջանային կառավարության ներկայացուցիչ Հայլու Ադուգնան հարձակումների պատասխանատվությունը բարդել է Օրոմոյի ազատագրական բանակի (OLA) վրա։ Նրա պնդմամբ՝ ապստամբներն ու նրանց դաշնակիցները փորձում են հրահրել միջէթնիկական և միջկրոնական ընդհարումներ՝ երկրի հյուսիսում ունեցած ռազմական անհաջողություններից ուշադրությունը շեղելու համար։ Այդ մեղադրանքները հաստատող ապացույցներ նա չի ներկայացրել։
Ադուգնան ցավակցություն է հայտնել զոհվածների ընտանիքներին և տեղեկացրել, որ տարածաշրջանային իշխանությունները սկսել են միջոցներ ձեռնարկել հարձակումներին առնչություն ունեցող անձանց դեմ։ Նա խոստացել է նաև օգնություն ցուցաբերել վիրավորներին և այն մարդկանց, որոնք ստիպված են եղել լքել իրենց տները։
OLA-ի ներկայացուցիչներից մեկնաբանություն ստանալ չի հաջողվել։ Փետրվարին խմբավորման առաջնորդ Ջաալ Մարրուն Associated Press-ին տված հարցազրույցում հերքել էր, որ իր մարտիկները նպատակաուղղված հարձակվում են խաղաղ բնակիչների վրա։
Օրոմիա տարածաշրջանը, որտեղ բնակվում է մոտ 40 միլիոն մարդ, շարունակում է մնալ 2018 թվականից ի վեր շարունակվող՝ կառավարական ուժերի և OLA-ի միջև զինված հակամարտության թատերաբեմ։ Տարածաշրջանում գործում են նաև այլ զինված խմբավորումներ և հանցավոր խմբեր, իսկ խաղաղ բնակիչները բախվում են սպանությունների, շորթումների և առևանգումների։
ՄԱԿ-ի քննիչները OLA-ին մեղադրել են սպանությունների, բռնաբարությունների և առևանգումների մեջ։ Մարդու իրավունքների պաշտպանները միաժամանակ փաստագրել են խախտումներ կառավարական ուժերի կողմից, դրանց թվում՝ անխտիր անօդաչու հարվածներ, առանց դատավարության մահապատիժներ և բռնի անհետացումներ։ Amnesty International-ի տվյալներով՝ հակամարտության երկու կողմերն էլ առնչություն ունեն առանց դատավարության մահապատիժների, խոշտանգումների, առևանգումների և բռնաբարությունների հետ։
Մարդու իրավունքների պաշտպանները նշում են, որ ինտերնետի անջատումները և անկախ լրատվամիջոցների ու քաղաքացիական հասարակության աշխատանքի սահմանափակումները դժվարացնում են խաղաղ բնակչության տառապանքների մասշտաբների գնահատումը։
