Հայտնի ռուս բլոգեր և գործարար Օքսանա Սամոյլովան չի պատրաստվում նախկին ամուսնուն՝ ռեփեր Ջիգանին, զրկել ծնողական իրավունքներից․ փոխարենը նա վեց ամսով կսահմանափակի նրա ծնողական իրավունքները։
Դատական նիստին ներկայացել են բլոգերի փաստաբանները, մինչդեռ ինքը՝ Սամոյլովան, դատարան չի ներկայացել։ Կողմերը չեն բացառում նաև հաշտության համաձայնության կնքումը։ Նախատեսվում է, որ վեցամսյա սահմանափակումը Ջիգանին հնարավորություն կտա վերանայել իր վարքագիծը և շտկել իրավիճակը։
Միևնույն ժամանակ, նախկին ամուսինը դեռևս կապ չի հաստատել Օքսանայի հետ։
Սեպտեմբերի վերջին Սամոյլովան դատարան էր դիմել՝ պահանջելով սահմանափակել նախկին ամուսնու ծնողական իրավունքները։ Նա ցանկանում էր ստանալ երեխաների դաստիարակության ամբողջական իրավունքը և թույլ տալ Ջիգանին հանդիպել նրանց միայն իր համաձայնությամբ։
Հայցի պատճառը ռեփերի տանը տեղի ունեցած աղմկահարույց միջադեպն էր։
Հիշեցնենք, որ ավելի վաղ հայտնել էինք, որ Ջիգանը Մերձմոսկվայում գտնվող իր առանձնատանը կրակոցներ էր արձակել և շուրջ ինը ժամ պահել տան աշխատակիցներին ու թիկնապահներին։ Ըստ հրապարակված տեղեկությունների՝ միջադեպի ընթացքում երեխաները թաքնվել էին պահարաններում և զանգահարել մորը։ Դեպքի վայր ժամանած իրավապահներին հաջողվել էր զինաթափել ռեփերին։
