ԱՄՆ նախագահ Ջո Բայդենի հեռացող վարչակազմը մտադիր է Իսրայելին 8 մլրդ դոլար արժողությամբ զենքի փաթեթ վաճառել, այս մասին հայտնում է Axios պորտալը՝ վկայակոչելով աղբյուրներին։
Ըստ նրանց՝ ԱՄՆ Պետդեպարտամենտը Կոնգրեսին ոչ պաշտոնապես տեղեկացրել է հրեական պետության հետ գործարք կնքելու իր մտադրության մասին, որով Իսրայելը զենք ու զինամթերք կստանա ԱՄՆ-ից։ Մասնավորապես, Միացյալ Նահանգները Իսրայելին կտրամադրի հրթիռներ կործանիչների և գրոհային ուղղաթիռների համար, հրետանային արկեր, փոքր տրամաչափի ռումբեր, լրացուցիչ JDAM զինամթերքի հավաքածուներ, 500 ֆունտանոց ռումբեր (մոտ 227 կգ) և այլ զինամթերք:
Հրատարակության աղբյուրներն ընդգծում են, որ գործարքը նախատեսված է «Իսրայելի անվտանգությանը երկարաժամկետ աջակցության համար»։ Ակնկալվում է, որ որոշ զինատեսակներ Իսրայել կտեղափոխվեն անմիջապես Պենտագոնի պահեստներից, սակայն զենքի մեծ մասի առաքումը կտևի «մեկ տարի կամ ավելի»:
Axios-ն ընդգծում է, որ Իսրայելին զենքի հնարավոր վաճառքը պետք է հաստատվի ԱՄՆ Ներկայացուցիչների պալատի և Սենատի արտաքին հարաբերությունների հանձնաժողովների կողմից։
