Արհեստական ինտելեկտի (ԱԻ) օգտագործումը աշխատանքում կարող է նոր հնարավորություններ բացել, բայց վերջին ուսումնասիրությունները ցույց են տալիս, որ այն նաև խորացնում է սեռային կողմնակալությունները։ Հոնկոնգի պոլիտեխնիկական և Պեկինի համալսարանների հետազոտողները պարզել են, որ նույն աշխատանքի դեպքում կանայք, ովքեր օգտվում են ԱԻ գործիքներից, հաճախ գնահատվում են որպես պակաս ունակ, քան նույն աշխատանքը կատարած տղամարդիկ։
Հետազոտությունը իրականացվել է միջազգային տեխնոլոգիական ընկերությունում, որտեղ աշխատողներին խրախուսում էին կիրառել գեներատիվ ԱԻ գործիքներ։ Սակայն պարզվել է, որ ընդամենը 31% կին ինժեներ է օգտագործում դրանք՝ 41% տղամարդկանց համեմատ։ Մեկնաբանությունների վերլուծությունը ցույց է տվել, որ նույնիսկ նույն կոդի դեպքում, եթե ենթադրվում էր, որ այն գրվել է ԱԻ-ի օգնությամբ, կանանց ավելի խիստ էին գնահատում։ Կանանց դեպքում «կոմպետենտության տուգանքը» հասնում էր մինչև 13%, մինչդեռ տղամարդկանց մոտ՝ մոտ 6%։
Այս երևույթը չի սահմանափակվում միայն ԱԻ-ի կիրառմամբ․ նախորդ ուսումնասիրություններն էլ ցույց են տվել, որ նույն արդյունքների դեպքում կանայք հաճախ ավելի ցածր են գնահատվում «հնարավորությունների» կամ «պոտենցիալի» չափանիշներով։ Նույնիսկ բարձր ցուցանիշներ ունենալով՝ կանայք հաճախ պակաս հավանականություն ունեն ստանալու առաջխաղացում կամ խրախուսում։ Մասնագետները նշում են, որ այս իրավիճակը կարող է զսպել կանանց՝ նորարարական գործիքներ օգտագործելու պատրաստակամությունը, և առաջարկում են լուծումներ՝ գնահատել միայն աշխատանքի արդյունքը, հնարավորության դեպքում կիրառել անանուն (blind) գնահատման մեթոդներ և սահմանել հստակ չափորոշիչներ, որոնք կբացառեն սուբյեկտիվ կարծիքների ազդեցությունը։
