Արարատ լեռան մոտ գտնվող կազմավորումն ուսումնասիրող գիտնականների միջազգային խումբը նոր հետազոտության մեջ հայտարարում է, որ 4300 տարի անց Նոյյան տապանի գտնվելու վայրը վերջապես հաստատվել է 100% վստահությամբ։ Նոյյան տապանի մասին գրում է Daily Mail-ը։
Թիմը ռադարային սկանավորում է իրականացրել և տարբեր խորություններում կառուցվածքային շերտեր, ուղիղ գծեր, ուղիղ անկյան տակ հատումներ և ընդարձակ խոռոչներ հայտնաբերել։ Ավելին, հետազոտության հեղինակները նշում են, որ սկանավորումը հաստատել է հնարավոր խցիկների, միջանցքների և թունելների, ինչպես նաև երեք մասի բաժանված հզոր ստորգետնյա շերտի առկայությունը։ Այդ առանձնահատկությունը համեմատվում է աստվածաշնչյան այն պնդման հետ, ըստ որի տապանը կառուցված էր երեք տախտակամածով։
Հորատման ընթացքում՝ միջուկային նմուշների դուրսբերմամբ, հայտնաբերվել է նաև օրգանական նյութերով հարուստ շերտ. գիտնականները վերլուծություն են անցկացնում՝ պարզելու համար՝ արդյոք այն պարունակո՞ւմ է քայքայված փայտի մնացորդներ, գրում է Фокус-ը։ Արդյունքում գիտնականները վստահեցնում են, որ իրենց 100%-ով հաջողվել է ապացուցել, որ բլուրը բնական երկրաբանական գոյացություն չէ, այլ մարդակերտ օբյեկտ է։
Անկախ հետազոտող Էնդրյու Ջոնսի՝ Noah's Ark Scans նախագծի հիմնադրի պատմելով, որը վերջին 30 տարիներին ուսումնասիրում է այս շրջանը, ոչ վերջին ռադարային սկանավորումը, ոչ էլ կազմավորման ներսում իրականացված հորատումը կրաքարի կամ կարծր հիմնաքարի առկայություն չեն հայտնաբերել։ Այս տվյալները հերքում են այն տեսությունը, թե տվյալ օբյեկտը կրաքարի բլոկ է, որին սառցադաշտերն ու հողմահարման գործընթացները նավակի ձև են տվել լեռան լանջից իջնելուց հետո։ Սա նաև հերքում է այն վարկածը, թե դա հիմնաքար է, որի շուրջ տիղմ է կուտակվել։
Ընդսմին, հենց Ջոնսն է պնդում, որ նոր տվյալները թույլ չեն տալիս 100% հավանականությամբ ասել, թե կազմավորումն անպայման հենց աստվածաշնչյան Նոյյան տապանն է։ Այսպես թե այնպես, այն ամենը, ինչ այսօր գիտնականները կարող են պնդել, այն է, որ բլուրը երկրաբանական գոյացություն չէ։ Ջոնսը հավելել է նաև, որ ինքը խորապես համոզված է՝ Դուրուպընարի կազմավորումը Նոյյան տապանի թաղված մնացորդներն են, իսկ վերջին սկանավորման արդյունքները նոր համոզիչ ապացույցներ են տրամադրում։
