Սթևիան և լոհանի էքստրակտը կարելի է համարել ամենաանվտանգ շաքարի փոխարինիչները՝ չափավոր օգտագործման պայմանով։ Այս մասին Wellness Pulse պարբերականին հայտնել է Սանդրա Վիգելենեն՝ դիետոլոգ և գլոբալ սննդի փորձագետ Դանիայի Օրհուսի համալսարանի VIA քոլեջից։
Փորձագետի խոսքով՝ քաղցրացուցիչները կարելի է բաժանել երեք խմբի՝ արհեստական, բնական և շաքարային սպիրտներ (պոլիօլներ)։
Արհեստական քաղցրացուցիչները սինթետիկ նյութեր են, որոնք հարյուրավոր անգամ ավելի քաղցր են, քան շաքարը։ Դրանք գրեթե կալորիա չեն պարունակում և հաճախ օգտագործվում են դիետիկ մթերքներում և ըմպելիքներում։ Ամենահայտնի օրինակներից են ասպարտամը, սուկրալոզան, սախարինն ու կալիումի ացեսուլֆամը։
«Չնայած լայն տարածմանը, դրանց անվտանգությունը մինչ օրս քննարկման թեմա է։ Օրինակ՝ Քաղցկեղի ուսումնասիրության միջազգային գործակալությունը ասպարտամը դասակարգել է որպես հնարավոր քաղցկեղածին մարդու համար, սակայն միայն այն քանակներով, որոնք բազմակի անգամ գերազանցում են սովորական օգտագործումը», – նշել է փորձագետը։
Բացի այդ, որոշ ուսումնասիրություններ ցույց են տալիս, որ նման քաղցրացուցիչները կարող են ազդել աղիքների միկրոբիոտայի և ախորժակի վրա։ Սակայն, ինչպես ընդգծել է Վիգելենեն, այդ տվյալները դեռևս բավարար չեն առողջության վրա երկարաժամկետ ազդեցության մասին եզրակացություններ անելու համար։
Բնական, առանց կալորիայի քաղցրացուցիչները, ինչպիսին են սթևիան և լոհանի էքստրակտը (բազմամյա խոտաբույս բույսից), ստացվում են բույսերից։ Դրանք 150–300 անգամ ավելի քաղցր են, քան շաքարը, և հաճախ օգտագործվում են «բնական» կամ «օրգանիկ» նշմամբ արտադրանքներում։
«Այս նյութերը համարվում են անվտանգ, սակայն, չնայած բուսական ծագմանը, այնուամենայնիվ ենթարկվում են տեխնոլոգիական մշակման։ Ուստի չափավորությունն այստեղ ևս մնում է հիմնական սկզբունքը», – նշել է դիետոլոգը։
Շաքարային սպիրտները՝ (էրիթրիտոլ, սորբիտ, քսիլիտ, մալթիտ), հաճախ հանդիպում են ծամոնների, դիետիկ թխվածքների և քաղցրավենիքների մեջ։ Դրանք պարունակում են ավելի քիչ կալորիաներ, քան սովորական շաքարը, և ունեն ցածր գլիկեմիկ ինդեքս։ Սակայն դրանց չափից շատ օգտագործումը կարող է առաջացնել փքվածություն, գազեր և անգամ լուծ՝ հատկապես զգայուն մարդկանց մոտ։
«Շաքարի փոխարինիչները կարող են լինել հավասարակշռված սննդակարգի մի մաս, բայց չպետք է ծառայեն որպես արդարացում՝ չափից ավելի քաղցրացուցիչ պարունակող մթերքներ օգտագործելու համար», – եզրափակել է Վիգելենեն։
Թարգմանությունը՝ Euromedia24.com-ի
