Արաբական ութ երկրների (Բահրեյն, Եգիպտոս, Հորդանան, Իրաք, Կատար, Լիբանան, ԱՄԷ, Սաուդյան Արաբիա) արտգործնախարարները կոչ են արել դադարեցնել բոլոր ռազմական գործողությունները Սիրիայում։ Այս մասին ասված է Հորդանանի Ակաբա քաղաքում նրանց հանդիպման արդյունքներով ընդունված հայտարարության մեջ։
Հորդանանի արտգործնախարարության հրապարակած փաստաթղթում նախարարները հաստատել են Սիրիայում «բոլոր ռազմական գործողությունների անհապաղ դադարեցման անհրաժեշտությունը»։ Նախարարները նաև կոչ են արել պահպանել սիրիական պետական հաստատությունները՝ հանրապետությունում քաոսը կանխելու համար։
«Մենք վերահաստատում ենք Սիրիայի պետական ինստիտուտները պահպանելու և սիրիական ժողովրդին ծառայելու և երկիրը քաոսի մեջ մտնելուց պաշտպանելու նրանց կարողությունների ընդլայնման անհրաժեշտությունը»,- ասվում է փաստաթղթում, որի տեքստը հրապարակել է Հորդանանի ԱԳՆ-ն։
Բացի այդ, արտգործնախարարները ցանկություն են հայտնել ակտիվացնել իրենց ջանքերը ահաբեկչության դեմ պայքարում, որը վտանգ է ներկայացնում Սիրիայի անվտանգության համար։
