Վրաստանի նախագահի պաշտոնում իշխող «Վրացական երազանք-Ժողովրդավարական Վրաստան» կուսակցությունից առաջադրված թեկնածուի՝ նախկին պատգամավոր Միխեիլ Կավելաշվիլիի ընտրությունը կնպաստի երկրի պետականության և ինքնիշխանության ամրապնդմանը։ Այդ մասին ճեպազրույցում հայտարարել է Վրաստանի վարչապետ Իրակլի Կոբախիձեն։
«Վստահ եմ, որ Միխայիլ Կավելաշվիլիի ընտրությունը կարևորագույն պաշտոնում շատ կարևոր ներդրում կունենա վրացական պետականության և մեր ինքնիշխանության ամրապնդման, ինչպես նաև մեր երկրում արմատականության և բևեռացման նվազեցման գործում»,- ասել է նա։
Կոբախիձեն շնորհավորել է Կավելաշվիլիին պետության ղեկավարի պաշտոնում ընտրվելու կապակցությամբ և նշել, որ «Վրաստանում երկու տարուց ավելի հայրենասեր և հոգեբանորեն հավասարակշռված նախագահ չի եղել»։
Նրա խոսքով՝ այս առումով Կավելաշվիլիի ընտրությունը շրջադարձային կլինի։ Նաև Կավելաշվիլիի օրոք, ինչպես նշել է վարչապետը, նախագահության ինստիտուտը կվերագտնի իր սահմանադրական առաքելությունն ու արժանապատվությունը։
