Վրաստանի խորհրդարանում մեկնարկել են Վրաստանի վեցերորդ նախագահի ընտրությունները։ Քվեարկությունը հեռարձակում է Վրաստանի հանրային հեռարձակողի Առաջին ալիքը։
Առաջին անգամ նախագահն ընտրվում է ոչ թե ուղիղ ժողովրդական քվեարկությամբ, այլ 300 ընտրողներից բաղկացած ժողովով։ Այն բաղկացած է Վրաստանի խորհրդարանի 150 պատգամավորներից, Աջարիայի Գերագույն խորհրդի 21 պատգամավորներից, Աբխազիայի Գերագույն խորհրդի 20 ներկայացուցիչներից և երկրի տարբեր շրջանների շրջանային սակրեբուլո-մունիցիպալ իշխանությունների 109 պատգամավորներից։
Ընդդիմությունը, որը բոյկոտում է խորհրդարանի աշխատանքը, չի մասնակցում ընտրություններին․ այն նույնպես չի ներկայացրել նախագահի իր թեկնածուին։
Այսպիսով, Վրաստանի նախագահի պաշտոնի միակ թեկնածուն իշխող «Վրացական երազանք-Ժողովրդավարական Վրաստան» կուսակցության թեկնածու, նախկին պատգամավոր, նախկին ֆուտբոլիստ Միխեիլ Կավելաշվիլին է։
Սպասվում է, որ Վրաստանի Կենտրոնական ընտրական հանձնաժողովը ընտրությունների արդյունքները կհրապարակի տեղական ժամանակով ժամը 14:00-ին: Եթե Կավելաշվիլին չստանա ընտրողների ընդհանուր թվի ձայների երկու երրորդը, կնշանակվի երկրորդ փուլ, որը կկայանա նույն օրը։Երկրորդ փուլում հաղթելու համար Կավելաշվիլիին անհրաժեշտ կլինի ձայների պարզ մեծամասնությունը։Վրաստանի նախագահը կընտրվի հինգ տարով։
Պետության նոր ղեկավարի երդմնակալությունը տեղի կունենա դեկտեմբերի 29-ին։
