Թուրքիան ակնկալում է, որ Սիրիայի ժամանակավոր կառավարությունը «ճիշտ քայլեր» կանի և վտանգ չի ներկայացնի իր հարևանների համար, Անկարան կաջակցի այդ գործընթացին, հայտարարել է Թուրքիայի նախագահ Ռեջեփ Թայիփ Էրդողանը։
Էրդողանը ուրբաթ օրը հեռախոսազրույց է ունեցել Սուդանի ինքնիշխան խորհրդի նախագահ Աբդել Ֆաթահ Ալ-Բուրհանի հետ։ Զրույցի ընթացքում կողմերը քննարկել են երկկողմ հարաբերությունները, տարածաշրջանային և գլոբալ գործընթացները։
Նախագահ Էրդողանն ասել է, որ 13-ամյա հումանիտար ճգնաժամից հետո սիրիացի ժողովուրդը հասել է իր ապագան որոշելու փուլին։
«Թուրքիան աջակցում է Սիրիայի քաղաքական միասնության և տարածքային ամբողջականության պահպանմանը և կշարունակի այդ աջակցությունը՝ ապահովելու, որ ժամանակավոր կառավարությունը համապարփակ, ընդգրկուն և ճիշտ քայլեր ձեռնարկի՝ ծառայելու սիրիացի ժողովրդին»,-ասել է Թուրքիայի նախագահը։
