«Քանի դեռ կա միլիոն բառը, միշտ լրագրողները հոդված գրելու են ու քննադատելու են։ Եթե այն լինի 1 կամ 100 միլիոն, միանգամից դրամը փոխում եք դոլարի, որ դոլարով լինի»,- հրավիրված ասուլիսում հայտնեց Երևանի փոխքաղաքապետ Սուրեն Գրիգորյանը՝ հայտարարելով, որ ամանորյա տոնակատարությունների վերաբերյալ լրագրողական համայնքի հոդվածներն անխուսափելի գործընթաց են։
Արձագանքելով լրագրողի հարցի, որ Տարոն Մարգարյանը տասնապատիկ քիչ էր ծախսում ամանորյա տոնոկատարությունների համար, բայց քննադատվում էր ներկայիս իշխող ուժի կողմից՝ Գրիգորյանն ասաց, որ չի հիշում, թե Տարոն Մարգարյանի ժամանակ այսքան մասշտաբային միջոցառումների իրականացվեր։
Փոխքաղաքապետի կարծիքով Թբիլիսիի լավ տոնական լուսավորությունն է պատճառը, որ մեր քաղաքացիները գնում են այնտեղ Ամանորը նշելու։
«Այս տարվա թիվը մեկ անգամ էլ հնչեցնեմ՝ ծախսվելու է 549 մլն 706 հազար դրամ»-հայտնեց փոխքաղաքապետը և նշեց, որ նախատեսել էին թարմացնել գլխավոր տոնածառը, բայց գնման լոտը տեղի չի ունեցել և նախատեսված 50 մլն դրամը չի ծախսվել։
Նա հայտնեց, որ 60 մլն դրամ ծախսվելու է Հանրապետության հրապարակի շատրվանների ձևվորման աշխատանքներին և այն իրականացնելու է «Ֆակտորի Պրոդաքշն» ընկերությունը։
Սուրեն Գրիգորյանը անդրադարձավ նաև Հայկ Մարությանի որոշմամբ նոր գլխավոր տոնածառ գնելու փաստին եւ նշեց.
«Ճիշտ է արել, լավ է արել».
Փոխքաղաքապետը նաեւ հրապարակեց տոնական լույսերը վառելու օրը.
«99 %-ով, կամ 100 %-ով դեկտեմբերի 8-ին է լինելու մայր տոնածառի լույսերի վառման արարողությունը»,-տղեկացրեց նա:
