Լիբանանի դատական իշխանությունները որոշում են կայացրել Սիրիային հանձնել երկրի տապալված նախագահ Բաշար Ասադի բանակի նախկին բարձրաստիճան սպային, որը մեղադրվում է սիրիական հակամարտության ընթացքում կատարված հանցագործությունների մեջ, հաղորդում է Associated Press-ը՝ հղում անելով Լիբանանի իշխանությունների հայտարարությանը։
Գեներալ-մայոր Ադիլ Իսսան կդառնա առաջին նախկին սիրիացի զինծառայողը, որին Լիբանանը Դամասկոսին կհանձնի 2024 թվականի վերջում Ասադի ռեժիմի անկումից հետո։ Ակնկալվում է, որ Սիրիայում նա կկանգնի դատարանի առաջ։ Կոնկրետ մեղադրանքները դեռևս պաշտոնապես չեն բացահայտվում։
Երեքշաբթի Լիբանանի Գլխավոր անվտանգության վարչության աշխատակիցները Իսսային հասցրել են սահմանային անցակետերից մեկը, որտեղ նրան պետք է հանձնեն սիրիական իշխանություններին։ Որոշումն ընդունվել է երկու երկրների միջև 1951 թվականի համաձայնագրի համաձայն, որը նախատեսում է հանցագործություններ կատարելու մեջ կասկածվողների արտահանձնում։
Իսսային ձերբակալել էին օգոստոսի 8-ին, այն բանից հետո, երբ նա եկել էր Բեյրութում Սիրիայի դեսպանատուն՝ փաստաթղթեր ձևակերպելու համար։ Դեսպանատան ներկայացուցիչները Լիբանանի դատախազությանը հայտնել էին, որ գեներալը հետախուզվում է սիրիական իշխանությունների կողմից։ Դրանից հետո նրան կալանքի տակ էին պահել Բեյրութի Արդարադատության պալատի շենքում։
Անցած շաբաթ Իսսային հարցաքննել էր Լիբանանի գլխավոր դատախազը Վճռաբեկ դատարանում՝ Ահմադ Ռամի Հաջը։ Քննությանը հետաքրքրում էին գեներալի կողմից ենթադրաբար կատարված հանցագործությունները սիրիական Դեյր-էզ-Զոր և Ռաքքա նահանգներում՝ 2011 թվականին սկսված պատերազմի ընթացքում։
Դատական պաշտոնյաների տվյալներով՝ Իսսան մերժել է բոլոր մեղադրանքները՝ հայտարարելով, որ որպես զինվորական՝ պարզապես կատարել է հրամանները։
Ասադների դինաստիայի անկումից հետո, որը Սիրիայում իշխանության էր մոտ հինգ տասնամյակ, մի շարք նախկին զինծառայողներ և ուժային կառույցների աշխատակիցներ փախել են Լիբանան։ Նրանցից մի քանիսը մինչ այժմ այնտեղ են գտնվում։ Իսկ հենց Սիրիայում ծանր հանցագործությունների մեջ մեղադրվող նախկին ուժային գերատեսչությունների տասնյակ ներկայացուցիչներ արդեն ձերբակալվել են և կանգնել դատարանի առաջ։
Իսսայի հանձնումը տեղի է ունենում նախկին ռեժիմի ներկայացուցիչների դեմ լայնածավալ դատավարությունների ֆոնին։ Անցած շաբաթ սիրիական դատարանը հեռակա կարգով մահապատժի է դատապարտել Բաշար Ասադին և նրա կրտսեր եղբորը՝ Մահերին։ Նրանց զարմիկը՝ բրիգադի գեներալ Աթեֆ Նաջիբը, դարձել է նախկին ռեժիմի անվտանգության ծառայության ամենաբարձրաստիճան աշխատակիցը, որին Սիրիայում ձերբակալությունից հետո մահապատիժ է նշանակվել։ Ասադ եղբայրները ռեժիմի անկումից հետո փախել են Ռուսաստան։
Մեծ Բրիտանիայում տեղակայված Մարդու իրավունքների սիրիական դիտորդական կենտրոնի տվյալներով՝ Իսսան հրամանատարել է սիրիական բանակի 17-րդ դիվիզիան, իսկ 2015 թվականին նշանակվել է Իրաքին սահմանակից Դեյր-էզ-Զորում ցամաքային զորքերի հրամանատար։ 2016 թվականի վերջին նա անցել է թոշակի։
