Մելանոմայի՝ մաշկի քաղցկեղի բուժման համար փորձարկվող անհատականացված պատվաստանյութը իմունոթերապիայի հետ համատեղ կիրառելիս նվազեցրել է հիվանդության վերադարձի կամ մահվան ռիսկը 42%-ով։ Այս մասին հայտնում է BBC-ն։
Հետազոտությանը մասնակցել է մելանոմայով 1,137 չափահաս։ Նրանց մի մասը ստացել է անհատականացված պատվաստանյութը՝ Keytruda իմունոթերապիայի հետ համատեղ, իսկ մյուս մասը՝ պլացեբո՝ նույն իմունոթերապիայի ֆոնին։
Արդյունքները ցույց են տվել, որ պատվաստանյութի և իմունոթերապիայի համադրությունը նաև 38%-ով նվազեցրել է քաղցկեղի տարածման կամ մետաստազների առաջացման ռիսկը՝ երկու տարվա ընթացքում։
Պատվաստանյութը մշակվում է յուրաքանչյուր հիվանդի համար անհատապես՝ հիմք ընդունելով նրա ուռուցքի գենետիկական տվյալները։ Դրա նպատակն է օգնել իմունային համակարգին ճանաչել և ոչնչացնել քաղցկեղային բջիջները։
Արդյունքները խոստումնալից են, սակայն մասնագետները նշում են, որ բուժման երկարաժամկետ արդյունավետությունը գնահատելու համար անհրաժեշտ են լրացուցիչ տվյալներ։ Հետազոտության ամբողջական արդյունքները նախատեսվում է ներկայացնել Մադրիդում կայանալիք գիտաժողովում։
Դրանք դեռ չեն անցել գիտական ամսագրում հրապարակման համար նախատեսված գրախոսության գործընթացը։MSD և Moderna ընկերությունները նմանատիպ անհատականացված պատվաստանյութեր ուսումնասիրում են նաև քաղցկեղի այլ տեսակների բուժման համար։
