Եգիպտոսում 16 ուղևոր վնասվածքներ է ստացել երկրի հյուսիսում գտնվող Տանտա քաղաքի Մահալա-Ռուհ կայարանում, մարդատար գնացքի վագոնի ռելսերից դուրս գալու հետևանքով, հաղորդել է Egypt Today-ը։
Միջադեպը տեղի է ունեցել շաբաթ առավոտյան Դամանհուրից Տանտա ուղևորվող №450 գնացքի հետ, որը շարժվում էր Կալինի միջով։ Եգիպտոսի երկաթուղիների վարչության տվյալներով՝ կայարան մուտք գործելիս ռելսերից դուրս է եկել լոկոմոտիվից անմիջապես հետո գտնվող վագոնի առաջին անվազույգը։
Տուժածները ստացել են թեթև վնասվածքներ։ Դեպքի վայր են ուղարկվել վթարային բրիգադներ, ամբարձիչներ և տեխնիկական սարքավորումներ՝ վագոնը ռելսերին վերադարձնելու և երթևեկությունը վերականգնելու համար։
Դեպքի պատճառները պարզելու համար ստեղծվել է հատուկ տեխնիկական հանձնաժողով։ Նրա եզրակացությունները պետք է որոշեն վագոնի ռելսերից դուրս գալու հանգամանքներն ու հնարավոր հետագա միջոցները։
