Քիչ բանջարեղեն ուտող մարդիկ 60%-ով ավելի բարձր ռիսկ ունեն հոգեբանական խնդիրներ զարգացնելու, քան նրանք, ովքեր պարբերաբար ուտում են վարունգ, լոլիկ, կարտոֆիլ և գազար: Այս եզրակացությանն են հանգել Քվինսլենդի տեխնոլոգիական համալսարանի գիտնականները: Ուսումնասիրության արդյունքները հրապարակվել են «Միջազգային բնապահպանական հետազոտությունների և հանրային առողջության հանդեսում» (IJERPH):
Ուսումնասիրությանը մասնակցել է ավելի քան 45,000 ավստրալացի: Գիտնականները ուշադիր վերլուծել են մասնակիցների սննդակարգի և հոգեկան առողջության վերաբերյալ տվյալները: Մասնակիցներին նաև թեստավորել են հոգեբանական տառապանքի մակարդակը՝ դեպրեսիայի, անհանգստության և սթրեսի համապարփակ չափանիշ:
Պարզվել է, որ մարդիկ, ովքեր օրական ուտում էին մեկ չափաբաժնից պակաս բանջարեղեն (Ավստրալիայում՝ 75 գրամ), ավելի հակված էին հոգեբանական խնդիրներ ունենալուն, քան նրանք, ովքեր օրական օգտագործում էին հինգ կամ ավելի չափաբաժին: Արդյունքը հատկապես նկատելի էր կանանց մոտ, բայց միայն այն դեպքում, եթե նրանք դրանք շատ ակտիվորեն էին օգտագործում:
«Կանայք ամենաշատն են օգտվում օրական հինգ կամ ավելի չափաբաժին բանջարեղենից, մինչդեռ տղամարդիկ կարիք ունեն երեքից չորսի», - բացատրում է ուսումնասիրության ղեկավար դոկտոր Քերի Գիլեսփին:
Հետազոտողները նշում են, որ ուսումնասիրությունը չի ապացուցում, որ բանջարեղենը կարող է փոխարինել հոգեկան առողջության խանգարումների լիարժեք թերապիային: Այնուամենայնիվ, արդյունքները համապատասխանում են առողջ սննդակարգի վերաբերյալ առկա առաջարկություններին: Արդեն հաստատվել է, որ բուսական սննդի մեջ պարունակվող հակաօքսիդանտները կարող են մասամբ նվազեցնել ուղեղի բորբոքումը և շտկել նեյրոհաղորդիչների քիմիական անհավասարակշռությունը, որոնք դեպրեսիայի զարգացման հետ կապված երկու գործոններ են:
Թարգմանությունը՝ Euromedia24.com-ի
