Բարձր ճարպային սննդակարգը կարող է մեծացնել թրոմբոզի ռիսկը՝ ազդելով աղիքային միկրոբիոտայի վրա, պարզել են Չինաստանի գիտությունների ակադեմիայի գիտնականները: Ուսումնասիրության արդյունքները հրապարակվել են Cell Reports Medicine (CRM) ամսագրում:
Մկների վրա կատարված փորձերը ցույց են տվել, որ սննդակարգում ավելորդ ճարպի առկայության դեպքում աղիներում ակտիվանում են պալմիտինաթթու (PA) արտադրելու ունակ մանրէների որոշակի շտամներ: Այս նյութը, ինչպես պարզվում է, խախտում է արյան մակարդման համակարգի հավասարակշռությունը: Գիտնականների կարծիքով, այն ճնշում է կարևոր APC սպիտակուցի ազդեցությունը, որը «նոսրացնում» է արյունը և միաժամանակ ակտիվացնում թրոմբոցիտները:
Ուսումնասիրությունը հաստատել է, որ պալմիտինաթթու արտադրող Bacteroides thetaiotaomicron մանրէների առկայությունը հանգեցնում է հիպերկոագուլյացիայի՝ մի վիճակի, որի դեպքում թրոմբոզի ռիսկը մեծանում է:
Բացի այդ, պարզվել է, որ ճարպային սնունդը նպաստում է Clostridium perfringens-ի բազմացմանը աղիներում: Այս տեսակի մանրէները ազդում են արյան մակարդման վրա՝ բարձրացնելով ֆիբրինոգենի մակարդակը: Սովորաբար այս սպիտակուցը «կնքում է» վերքը և կանխում արյունահոսությունը, բայց դրա ակտիվ աշխատանքը կարող է հանգեցնել արյան մակարդուկների առաջացմանը:
Հետազոտողները նաև հայտնաբերել են պաշտպանության հնարավոր միջոց՝ ցիտրուսային մրգերում հանդիպող կենսաֆլավոնոիդ հեսպերիդինը։ Այս միացությունը կարողացել է արգելափակել ֆիբրինոգենի հետ կապված մակարդման գործընթացի հիմնական փուլերից մեկը։
Թարգմանությունը՝ Euromedia24.com-ի
