Քնի խանգարումները և հոգնածությունը կարող են լինել դեպրեսիայի նշաններ։ Այս մասին «Газета.Ru»-ին հայտնել է «Ատլաս» կլինիկաների հոգեբույժ, հոգեթերապևտ Տիմուր Մուտալիևը։
«Քնի խանգարումները և հոգնածությունը դեպրեսիայի ոչ ակնհայտ նշաններ են», — նշել է մասնագետը։
Մուտալիևի խոսքով՝ դեպրեսիան հազվադեպ է լինում այնպես, ինչպես ներկայացվում է ֆիլմերում՝ մռայլ, անձրևոտ Լոնդոնի պատկերով։ Շատ հաճախ մարդը շարունակում է գնալ աշխատանքի, սակայն ամեն ինչ անում է «ավտոպիլոտով», իսկ երեկոյան կարծես «մարտկոցը նստում է»։
«Մարդիկ բողոքում են հոգնածությունից, անքնությունից կամ հակառակը՝ քնում են օրական 10–12 ժամ, ամեն ինչ բացատրում են «սեզոնային վիճակով», — ասել է բժիշկը։
Դեպրեսիայի այլ նշանների թվում հոգեթերապևտը նշել է նաև՝ սովորական հաճույքներից հրճվանքի կորուստը և գրգռվածությունը։
«Սիրելի սերիալներն այլևս չեն գրավում, կիթառը փոշոտվում է, ընկերների հետ հանդիպումները դառնում են պարտականություն։ Տխրության փոխարեն կարող է առաջանալ գրգռվածություն՝ անսպասելի պայթյուններ աննշան պատճառներով. սա դեպրեսիայի տարածված ուղեկից է տղամարդկանց և դեռահասների շրջանում», — նշել է բժիշկը։
Մուտալիևը հավելել է, որ դեպրեսիայի մեկ այլ նշան կարող են լինել ֆիզիկական համառ ախտանիշները առանց հստակ պատճառի՝ խամրած ցավեր մեջքի, ստամոքսի կամ գլխի շրջանում, որոնք հետազոտություններով չեն բացատրվում։ Եթե նման դրսևորումները տևում են ավելի քան երկու շաբաթ և խանգարում են առօրյա կյանքին, ժամանակն է դիմելու մասնագետի։
Բժիշկը կոչ է արել խուսափել «հավաքիր քեզ» կամ «ուրիշների վիճակն ավելի վատ է» արտահայտություններից։ Նրա կարծիքով՝ դրա փոխարեն ավելի լավ է առաջարկել օգնություն՝ մասնագետի հետ կապ հաստատելու և այցի ժամանակ ուղեկցելու համար։
«Վաղաժամ դիմելն օգնում է արագ հասնել ռեմիսիայի (դադարի) և վերադարձնել ոչ միայն տրամադրությունը, այլև կյանքի համը», — ամփոփել է մասնագետը։
Թարգմանությունը՝ Euromedia24.com-ի
