Ինչպես արդեն հայտնել ենք, Մոլդովայում սկսվել է նախագահական ընտրությունների քվեարկությունը։ Երկրի բնակիչները նաև մասնակցում են Մոլդովայի՝ Եվրամիությանն անդամակցելու հանրաքվեին։
Գործող նախագահ Մայա Սանդուն համարվում է քարոզարշավի ֆավորիտը, որում պետության ղեկավարի պաշտոնի համար պայքարում են ևս 10 հոգի։ Սանդուի ամենաուժեղ մրցակիցը ընդդիմադիր Սոցիալիստական կուսակցության առաջնորդ Ալեքսանդր Ստոյանոգլոն է։
Միևնույն ժամանակ, ընդդիմադիր «Հաղթանակ» դաշինքի մի խումբ պատգամավորներ և հասարակական գործիչներ արդեն բաց նամակ են հղել միջազգային կազմակերպություններին՝ Մոլդովայում տեղի ունեցած ընտրությունների և հանրաքվեի ժամանակ խախտումների վերաբերյալ։ Նրանց խոսքով՝ իշխանությունները հրաժարվել են թույլ տալ եվրոպական կազմակերպությունների բոլոր դիտորդներին վերահսկել քվեարկության ընթացքը և քվեաթերթիկների հաշվարկը։
