Մոնաշի համալսարանի, Մելբուռնի համալսարանի և Լոնդոնի համալսարանական քոլեջի գիտնականները բացահայտել են, թե ինչպես կարող էր կյանքը ծագել Երկրի վրա՝ և ինչպես միկրոբները կարող են այսօր օգնել մեզ կլիմայի փոփոխության դեմ պայքարում։ Աշխատանքը հրապարակվել է The ISME Journal գիտական ամսագրում։
Խոսքը միկրոբիոլիտների մասին է՝ քարե կառուցվածքներ, որոնք կառուցում են միկրոօրգանիզմների գաղութները։ Դրանք համարվում են մոլորակի վրա կյանքի ամենահին հետքերից։ Պարզվել է, որ այդ կառուցվածքների մեջ ապրող շատ միկրոբներ գոյատևում են ոչ թե լույսի շնորհիվ, ինչպես բույսերը, այլ քիմիական ռեակցիաների միջոցով։
«Մենք հայտնաբերեցինք, որ այդ միկրոբները կարող են էներգիա ստանալ նույնիսկ լիակատար մթության մեջ՝ օրինակ՝ օգտագործելով ջրածին, ամոնիակ կամ երկաթ», — պատմում է աշխատանքի համահեղինակներից մեկը՝ Մոնաշի համալսարանից դոկտոր Ֆրանչեսկո Ռիչին։
Նրա խոսքերով՝ դա վկայում է, որ միկրոբիոլիտները յուրօրինակ «էվոլյուցիայի լաբորատորիաներ» էին, որտեղ ծնվում էին գոյատևման նոր եղանակներ։
Մյուս հետազոտողը՝ դոկտոր Բոբ Լեունգը, հավելել է․ «Այս միկրոբները գործում են միասին՝ որպես լավ համակարգված թիմ։ Նրանք ոչ միայն գոյատևում են, այլև ակտիվորեն վերամշակում են ածխաթթու գազը նույնիսկ գիշերը, երբ ֆոտոսինթեզ տեղի չի ունենում»։
Ուսումնասիրությունը ցույց է տալիս, որ միկրոբային համայնքները կարող են մոդել հանդիսանալ մթնոլորտը ջերմոցային գազերից մաքրելու համար։ Հետազոտողները վստահ են, որ այդ մեխանիզմները հնարավոր է կիրառել արդյունաբերական արտանետումների չեզոքացման նպատակով։
Թարգմանությունը՝ Euromedia24.com-ի
