Թուրքիայի նախագահ Ռեջեփ Թայիփ Էրդողանը «3+3» տարածաշրջանային հարթակի շրջանակներում արտգործնախարարների հետ հանդիպման ժամանակ կոչ է արել ՄԱԿ-ին էմբարգո սահմանել Իսրայելին զենքի մատակարարման նկատմամբ։Ստամբուլում այսօր կայացել է Թուրքիայի, Ռուսաստանի, Ադրբեջանի, Հայաստանի և Իրանի ԱԳ նախարարների հանդիպումը` Անդրկովկասում համագործակցության զարգացման «3+3» տարածաշրջանային հարթակի շրջանակներում: Վրաստանի ներկայացուցիչը չի մասնակցել հանդիպմանը։
«Էրդողանը հայտարարել է, որ Իսրայելը սադրանքների է ձգտում` տարածաշրջանում հակամարտությունը տարածելու նպատակով, և որ առանց հրադադարի ամեն օրը մոտեցնում է տարածաշրջանային պատերազմը։ Նա նշել է, որ ՄԱԿ-ում Իսրայելին զենքի մատակարարման էմբարգոն արդյունավետ քայլ կլինի իսրայելական ագրեսիան դադարեցնելու համար, և որ Թուրքիան կշարունակի այդ դիրքորոշումը հայտնել բոլոր հարթակներում»,-հայտնել է Թուրքիայի ղեկավարի գրասենյակը։
Իսրայելը 2023 թվականի հոկտեմբերի 7-ին Գազայի հատվածից աննախադեպ մասշտաբային հրթիռային հարձակման է ենթարկվել։ Դրանից հետո ՀԱՄԱՍ պաղեստինյան շարժման մարտիկները ներթափանցել են սահմանամերձ շրջաններ` կրակ բացելով զինվորականների և քաղաքացիական անձանց ուղղությամբ և պատանդ վերցնելով ավելի քան 200 հոգու։
Իսրայելի պաշտպանության բանակը Գազայի հատվածում սկսեց «Երկաթե թրեր» գործողությունը, որը ներառում է նաև հարվածներ քաղաքացիական օբյեկտների ուղղությամբ: Իսրայելը հայտարարեց անկլավի ամբողջական շրջափակման մասին՝ դադարեցվեցին ջրի, էլեկտրաէներգիայի, վառելիքի, սննդի և դեղորայքի մատակարարումները։
