Ծխելը և ալկոհոլը թողնելը, ինչպես նաև մարդու պապիլոմավիրուսի (HPV) դեմ պատվաստումը նպաստում են գլխի և պարանոցի շրջանում չարորակ ուռուցքների զարգացման ռիսկի նվազեցմանը։ Այս մասին հայտնել է Մայո կլինիկայի համալիր քաղցկեղի կենտրոնի ուռուցքաբան, բժիշկ Քեթրին Փրայսը։ Մասնագետի խոսքերը մեջբերում է SciTechDaily-ն։
Մասնագետի խոսքով՝ գլխի և պարանոցի քաղցկեղը (հատկապես բերանի խոռոչի) այսօր ամենաարագ զարգացող և ամենաագրեսիվ ուռուցքաբանական հիվանդություններից մեկն է։ Այն բնութագրվում է չարորակ ուռուցքների առաջացմամբ բերանի խոռոչում, լեզվի, լնդերի, շրթունքների, ձայնալարերի, կոկորդի և քթի խոռոչների վրա։ Սակայն ուղեղի քաղցկեղը չի դասվում այս կատեգորիայի մեջ։
Բժիշկը բացատրեց, որ գլխի և պարանոցի քաղցկեղը կարելի է բաժանել երկու տարբեր խմբերի՝ մարդու պապիլոմավիրուսի (HPV) հետ կապված և դրա հետ կապ չունեցող քաղցկեղներ։ Ծխախոտի և ալկոհոլի օգտագործումը մեծացնում է ոչ HPV քաղցկեղի զարգացման ռիսկը։
Ծխախոտի ծուխը պարունակում է քաղցկեղածին նյութեր, որոնք առաջացնում են ԴՆԹ-ի մուտացիաներ, իսկ մարմնում առկա ալկոհոլը վերածվում է ացետալդեհիդի՝ թունավոր նյութի, որը վնասում է բջջային կառուցվածքները։ Երկու գործոններն էլ նաև ուժեղացնում են բորբոքումը և թուլացնում իմունային համակարգը, ինչը նպաստում է ուռուցքների զարգացմանը։
Դոկտոր Փրայսը խորհուրդ է տալիս ոչ միայն հրաժարվել վատ սովորություններից, այլև նախապես պատվաստվել մարդու պապիլոմավիրուսի դեմ։ Վիրուսի որոշ շտամներ, մասնավորապես HPV-16-ը, իրենց ԴՆԹ-ն ներդնում են բջիջների մեջ՝ խաթարելով աճը և բաժանումը վերահսկող գեների գործունեությունը։ Արդյունքում, բջիջները սկսում են անվերահսկելիորեն բաժանվել, ինչը հանգեցնում է ուռուցքի առաջացմանը։
Դուք կարող եք վարակվել HPV-ով մաշկի և լորձաթաղանթների ցանկացած սերտ շփման միջոցով։ Շատ դեպքերում, HPV-ն փոխանցվում է սեռական ճանապարհով։
Թարգմանությունը՝ Euromedia24.com-ի
