TikTok-ի մայր ընկերությունը՝ ByteDance–ը, Մալայզիայում աշխատանքից ազատել է ավելի քան 500 աշխատակցի՝ նրանց փոխարինելով արհեստական ինտելեկտով։
Աշխատանքից ազատվածների մեծ մասը զբաղվում էր բովանդակության վերանայմամբ և մոդերացիայով, սակայն այս գործընթացը այժմ ավտոմատացված է, և ԱԻ-ն կարողանում է բացահայտել ու հեռացնել հարթակի կանոնները խախտող բովանդակության մոտ 80%-ը, հայտնում է Reuters-ը։
Նշվում է, որ կրճատումները կազդեն ոչ միայն Մալայզիայի վրա։ TikTok-ը պատրաստվում է կրճատումներ իրականացնել այլ երկրներում նույնպես, քանի որ ընկերությունը նախատեսում է ԱԻ-ն օգտագործել համաշխարհային բովանդակության մոդերացիայի համար: «ByteDance»-ում այժմ աշխատում է ավելի քան 110 հազար աշխատակից՝ աշխարհի ավելի քան 200 քաղաքներից։
Բացի այդ, «ByteDance»-ը հայտարարել է TikTok Music երաժշտական հոսքային ծառայության փակման մասին։ Այս ծառայությունը հասանելի էր մի քանի երկրներում, այդ թվում՝ Ինդոնեզիայում, Բրազիլիայում, Ավստրալիայում, Սինգապուրում և Մեքսիկայում: TikTok Music-ի բաժանորդագրությունները կավարտվեն նոյեմբերի 28-ին, և օգտատերերը պետք է իրենց երգացանկերը տեղափոխեն այլ հարթակներ մինչ այդ ամսաթիվը։ Գումարի վերադարձի հայտերը կընդունվեն մինչև նոյեմբերի 28-ը:
