ԵՄ արտգործնախարարները երկուշաբթի օրը Բրյուսելում կայանալիք հանդիպման ժամանակ կքննարկեն Ուկրաինային ավելի քան 20 միլիարդ եվրո արժողությամբ օգնության փաթեթ տրամադրելու հարցը, այս մասին հայտնում է The New York Times-ը՝ վկայակոչելով քննարկումներին ծանոթ երկու պաշտոնյաների։
Ըստ նրանց՝ եվրոպացի առաջնորդները դիտարկում են նաև Ուկրաինա զորքեր ուղարկելու հեռանկարը՝ որպես «խաղաղապահ ուժ», ինչպես նաև քննարկում են ընդհանրապես ռազմական ծախսերի ավելացումը։
Ավելի վաղ Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն հայտարարել էր, որ Բուդապեշտը դեմ է 20 մլրդ եվրո հատկացնելու առաջարկին։
Երկուշաբթի օրը Բրյուսելում կայանալիք հանդիպմանը Եվրամիության 27 երկրների արտգործնախարարների ուշադրության կենտրոնում կլինեն Ուկրաինային ռազմական օգնության ուժեղացումը, Էր-Ռիադում ԱՄՆ-ի և Ռուսաստանի միջև բանակցությունները, ինչպես նաև Սիրիայում տիրող իրավիճակը։
Ինչպես նախօրեին լրագրողներին հայտնել է ԵՄ ներկայացուցիչը, արտգործնախարարները մտադիր են հաստատել Ռուսաստանի Դաշնության դեմ անհատական և տնտեսական պատժամիջոցների 16-րդ փաթեթը։
