Եվրամիության (ԵՄ) անդամներ Գերմանիան, Դանիան, Իսպանիան, Նիդեռլանդները, Ֆինլանդիան և Ֆրանսիան կոչ են արել Եվրամիության ղեկավարությանը չեղարկել Սիրիայի դեմ պատժամիջոցները բանկային, տրանսպորտի և էներգետիկայի ոլորտներում՝ կապված երկրում իշխանափոխության հետ:
Ինչպես նշվում է Reuters-ի ձեռք բերած փաստաթղթում, ԵՄ-ն «անհապաղ պետք է կարգավորի Դամասկոսի դեմ սահմանված պատժամիջոցների ռեժիմը»։ Առաջարկվում է մեղմացնել քաղաքացիական օդային ճանապարհորդությունների և նավթագազային արդյունաբերության տեխնոլոգիաների արտահանման սահմանափակումները, ինչպես նաև ապաշրջափակել Եվրամիության և Սիրիայի միջև ֆինանսական գործարքները։
Եթե նոր իշխանությունների կողմից մարդու և փոքրամասնությունների իրավունքների հարգման վերաբերյալ Բրյուսելի ակնկալիքները «չբավարարվեն», ԵՄ-ն կվերականգնի նախկինում չեղարկված սահմանափակումները, ասվում է եվրոպական վեց երկրների հայտարարության մեջ: Այն նաև նշում է, որ Սիրիայի նախկին նախագահ Բաշար ալ-Ասադի և նրա ընտանիքի դեմ անձնական պատժամիջոցները կմնան ուժի մեջ։
Նշվում է, որ Սիրիայում իշխանությունը զավթած «Հայաթ Թահրիր ալ-Շամ» խմբավորումից ահաբեկչական կազմակերպության կարգավիճակի վերացումը պետք է քննարկվի ՄԱԿ-ի մակարդակով և «համաձայնեցված նրա ամենամոտ գործընկերների հետ»։
