Համաճարակաբանի փոխանցմամբ՝ մետապնևմովիրուսային վարակի տեսակի դեմ կանխարգելիչ միջոցառումները, որպես այդպիսին, նույնն են, ինչպես այլ վիրուսների դեպքում։ Դրանք են՝ հասարակական վայրեր այցելելուց հետո, ուտելուց առաջ լվանալ ձեռքերը օճառով, խուսափել սերտ շփումից այն մարդկանց հետ,ովքեր ունեն սուր շնչառական վարակների ախտանշաններ։ Պարբեաբար պետք է օդափոխել, ախտահանել գտնվելու վայրը, սենյակը, աշխատասենյակը, փակ տարածքները, որտեղ կան մարդկանց կուտակումներ,դեմքին չդիպչել, հետևել հազի ու փռշտոցի հիգիենիկ կանոններին, կրել դիմակ ու 4 ժամը մեկ փոխել։
Ինչ վերաբերում է վիրուսի տեսակին, որը, ըստ միջազգային լրահոսի, լայն տարածում է ստացել Չինաստանի հյուսիսային մարզերում, մեր զրուցակցի խոսքերով, նոր չէ, այն առաջին անգամ արձանագրվել է 2001 թվականին։
«Ժողովրդական լեզվով ասած՝ ում մոտ քթահոսություն կամ հազ կա, սովոր ենք ասել, գրիպ է տանում, բայց դրանք գրիպանման հիվանդություններ են, իսկ ավելի կոնկրետ՝ այլ սուր շնչառական վարակներ»,- ասել է համաճարակաբանը։
Այս պահի դրությամբ՝ ամբողջ աշխարհում մեծ ուշադրություն է դարձվում Գրիպ Ա-ի (ինֆլուենցա Ա) և Կորոնավիրուսի վրա, որոնք արդեն իսկ ի ցույց են դրել համավարակի վերածվելու հնարավորությունը։ Ըստ նրա՝ յուրաքանչյուր վիրուսի դեպքում ծանր զարգացումներ կարող են տեղի ունենալ չբուժելու պարագայում, կամ եթե ախտահարումը ռիսկի խմբին պատկանող անհատի մոտ է։
«Տվյալ Մետապնևմովիրուսային վարակի դեպքում առավել ռիսկային խումբ համարվում են մինչև 14 տարեկան երեխաները, նրանցից առավել ծանր են տանում մինչև 5 տարեկան երեխաները։ Ռիսկի խմբում են նաև 65-ից բարձր տարիք ունեցող անձինք, խրոնիկ հիվանդություն կամ իմունային անբավարարություն ունեցողները»,- նշել է Ռ. Գրիգորյանը՝ ավելացնելով. «Ցանկացած շնչառական վիրուս, եթե ախտահարի այդ խմբի անձանց, ապա կունենանք բարդ դեպքեր»։
Համաճարակաբանը տեղեկացրեց,որ Մետապնևմովիրուսային վարակի դեպքում չի արձանագրվել է զարգացման բարդության այնպիսի աստիճան, որը հանգեցնի մահվան, ինչպես տեղի են ունեցել H1N1-ի դեպքում։ «Այդ կատեգորիայի վիրուս չէ, ընդհանրապես համաշխարհային գրականության մեջ այն ներկայացված չէ որպես համավարակ առաջացնող վարակ», - ասաց բժիշկը։
Նշենք, որ միջազգային մամուլի հրապարակումների համաձայն՝ Չինաստանում արձանագրվել է Մետապնևմովիրուսային (HMPV) վարակի բռնկում։
Ըստ Չինաստանի Հիվանդությունների վերահսկման և կանխարգելման կենտրոնի հաղորդման՝ Չինաստանում նկատվում է HMPV)վարակի դեպքերի կտրուկ աճ: Բացի այդ, լարված համաճարակային իրավիճակ է նաև մյուս շնչառական վարակների առումով, մասնավորապես՝ A գրիպի, Mycoplasma pneumoniae և Covid-19 վարակների:
Միջազգային լրահոսի համաձայն՝ HMPV վարակի տարածումը հանգեցրել է հանկարծակի մահվան դեպքերի զգալի աճի, հատկապես՝ 40-ից 80 տարեկան անձանց շրջանում: Ավելացել է է նաև մինչև 14 տարեկան երեխաների թոքաբորբով հոսպիտալացված դեպքերի թիվը:
Աղբյուր` Փաստինֆո
