Առողջապահության նախարարության և «Հայկական ակնաբուժության նախագիծ» բարեգործական հիմնադրամի համատեղ ծրագիրն արժանացել է Դիաբետի համաշխարհային հիմնադրամի դրամաշնորհին:
Ծրագիրն ուղղված է Հայաստանում շաքարային դիաբետի ռազմավարության իրականացմանն ու դիաբետով պայմանավորված կուրության կանխարգելմանը:
«Հայաստանում դիաբետի ազգային ռազմավարության իրականացում և կուրության կանխարգելում» ծրագրի շրջանակներում Երևանում և բոլոր մարզերում, առաջնային օղակում 2024-2027 թվականներին կիրականացվեն ակնային զննումներ, աչքի լազերային բուժում, առաջին անգամ կանցկացվի դիաբետիկ ոտնաթաթի սքրինինգի ծրագիր, անհրաժեշտության դեպքում` պացիենտները կուղղորդվեն վիրահատությունների:
Բացի այդ, սարքավորումներով կհամալրվեն մարզային բուժհաստատությունները, կկազմակերպվեն բուժաշխատողների վերապատրաստումներ, կմշակվեն դիաբետի և դրա բարդությունների վարման կլինիկական ուղեցույցներ, մարզերում կհիմնվեն դիաբետի դպրոցներ:
Ծրագրի աշխատանքների մեկնարկն ազդարարելու նպատակով Հայաստան են ժամանել Դիաբետի համաշխարհային հիմնադրամի (Դանիա) ներկայացուցիչներ, ովքեր առողջապահության նախարարության և Հայկական ակնաբուժության նախագծի մասնագետների հետ այցելել են Արմավիրի մարզ՝ տեղում ծանոթալու ծրագրի մի քանի կարևոր բաղադրիչների։
