ՆԱՏՕ-ի գլխավոր քարտուղար Մարկ Ռյուտեն հայտարարել է, որ Ռուսաստանի հետ խաղաղության համաձայնագրի կնքումից անմիջապես հետո Ուկրաինայում կհայտնվեն «ցանկացող երկրների կոալիցիայի» զինված ուժերը՝ ցամաքում, ծովում և օդում։
«Հենց որ խաղաղության համաձայնագիր ձեռք բերվի, կհայտնվեն զինված ուժեր, օդում՝ ինքնաթիռներ, իսկ ծովում՝ աջակցություն այն երկրների կողմից, որոնք համաձայնել են մասնակցել», — ասել է Ռյուտեն՝ ելույթ ունենալով Ուկրաինայի Գերագույն ռադայում։ Ռյուտեն խոսել է անգլերեն, նրա խոսքը թարգմանվել է Ռադայի աշխատակազմի կողմից։
ՆԱՏՕ-ի գլխավոր քարտուղարը հավելել է, որ դաշինքի մյուս անդամները «կօգնեն այլ ձևերով»։
