Telegram-ի հիմնադիր Պավել Դուրովը նորից հուշել է WhatsApp մեսենջերի (որը պատկանում է Meta ընկերությանը) անվստահելիության մասին՝ հրապարակելով զրույցի հատված, որտեղ, ըստ Դուրովի, Meta-ի ղեկավար Մարկ Ցուկերբերգը ծաղրում է օգտատերերին, որոնք իրեն վստահել են իրենց տվյալները և հավատում են նրա հայտարարություններին։
Դուրովի կողմից հրապարակված սքրինշոթում Մարկ Ցուկերբերգի լուսանկարը իր էջում ունեցող օգտատերը հարցնում է իր զրուցակցին, թե արդյոք իրեն տեղեկություններ են պետք «Հարվարդից մեկի մասին»։
«Ես ունեմ ավելի քան 4000 էլեկտրոնային նամակ, պատկեր, հասցե, սոցիալական ցանցերի հաշիվներ։ Մարդիկ հենց նոր ուղարկեցին սա։ Չգիտեմ՝ ինչու։ Նրանք «վստահում են ինձ»։ Հիմարներ», - գրված է նկարի վրա։
Դուրովը իր X (նախկին Twitter) հաշվում գրել է․
«Միակ փոփոխությունը, որը եղել է այդ զրույցից հետո, քանակն է։ Այսօր WhatsApp-ի սեփականատերը գաղտնի ծիծաղում է ոչ թե 4 հազար, այլ 4 միլիարդ «դեբիլների» վրա, որոնք հավատում են նրա հայտարարություններին (օրինակ՝ WhatsApp-ի կոդավորմանը)»։
