«Փետրվարի 1-ին կայանալիք նիստի օրակարգում ներառված են մի շարք պատգամավորների երդմնակալությունը և երկրի նախագահի ընտրությունները»,-նշվում է Իրաքի խորհրդարանի մամուլի հաղորդագրության մեջ, որը հրապարակել է INA գործակալությունը։
Իրաքի նախագահի ընտրությունները նախատեսված էին հունվարի 27-ին, սակայն խորհրդարանի նիստը հետաձգվել է քվորումի բացակայության պատճառով։
2025 թվականի դեկտեմբերի 29-ին Իրաքի խորհրդարանը ընտրեց նոր խոսնակ։
Այդ պահից սկսվեց 30-օրյա ժամկետի հաշվարկը, որի ընթացքում, ըստ երկրի սահմանադրության, պատգամավորները պարտավոր են ընտրել հանրապետության նախագահին, իսկ վերջինս պետք է հանձնարարի ամենախոշոր կոալիցիային առաջադրել վարչապետի պաշտոնի թեկնածու։
Հունվարի 24-ին Կոորդինացիոն խորհուրդը, որը միավորում է Իրաքի շիա մեծամասնության բլոկների և կուսակցությունների ներկայացուցիչներին, պաշտոնապես հայտարարեց երկրի նոր կառավարության ղեկավարի պաշտոնում Նուրի ալ-Մալիքիի թեկնածության առաջադրման մասին։
Իրաքի սահմանադրության համաձայն՝ երկրի նախագահի պաշտոնը պետք է զբաղեցնի քուրդ, վարչապետի պաշտոնը՝ մուսուլման-շիա դավանանքի ներկայացուցիչ, իսկ խորհրդարանի նախագահի պաշտոնը՝ մուսուլման-սուննի համայնքի ներկայացուցիչ։
Իրաքի նախագահի պաշտոնի համար պայքարում են 18 թեկնածուներ, այդ թվում՝ արտաքին գործերի նախարար Ֆուադ Հուսեյնը, ում աջակցում է Քրդստանի դեմոկրատական կուսակցությունը։
