Եգիպտոսը զգալի ջանքեր է գործադրում Իրանի և Միացյալ Նահանգների միջև լարվածությունը թուլացնելու և դիվանագիտական երկխոսություն հաստատելու ուղղությամբ։ Այդ մասին հայտարարել է Արաբական Հանրապետության նախագահ Աբդել Ֆաթթահ աս-Սիսին։
«Մենք լուրջ ջանքեր ենք գործադրում ներկայիս ճգնաժամը խաղաղեցնելու և բոլոր հնարավոր միջոցներով այն երկխոսության հասցնելու համար։ Մենք մտավախություն ունենք, որ եթե իրավիճակը շարունակի սրվել և վերաճի ռազմական գործողությունների, դա բացասաբար կազդի ամբողջ Մերձավոր Արևելքի վրա, այդ թվում՝ տնտեսական իրավիճակի վրա»,-ընդգծել է աս-Սիսին Եգիպտոսի Զինված ուժերի ակադեմիա կատարած այցի ընթացքում։
Միևնույն ժամանակ, Եգիպտոսի առաջնորդը ակադեմիայի ուսանողներին և դասախոսներին հիշեցրել է ԱՄՆ նախագահ Դոնալդ Թրամփի դերը Գազայի հատվածում հրադադարի ռեժիմի հաստատման գործում և կրկին շնորհակալություն հայտնել ամերիկացի առաջնորդին այդ կապակցությամբ նրա մշակած ծրագրի համար։
