ԱՄՆ նախագահ Դոնալդ Թրամփը քննարկում է Իրանին հարվածելու նոր ծրագիր, հաղորդում է CNN-ը՝ հղում անելով իր աղբյուրներին։
Նրանց տեղեկությունների համաձայն՝ ամերիկացի առաջնորդը ուսումնասիրում է Իսլամական Հանրապետության ղեկավարության և անվտանգության պաշտոնյաների դեմ ավիահարվածներ հասցնելու հնարավորությունը, որոնք, ենթադրաբար, պատասխանատու են ցուցարարների սպանությունների համար։
Թրամփի կողմից քննարկվող մեկ այլ տարբերակ է Իսլամական Հանրապետության միջուկային օբյեկտներին և կառավարական հաստատություններին հարվածներ հասցնելը։
Ամերիկացի առաջնորդը դեռևս վերջնական որոշում չի կայացրել գործողությունների ընթացքի վերաբերյալ, բայց կարծում է, որ ավելի շատ տարբերակներ ունի Մերձավոր Արևելքի տարածաշրջան ավիակիր հարվածային խմբի ժամանման շնորհիվ։
CNN-ը պնդում է, որ Թրամփը սկսել է քննարկել հարվածի նոր առաջարկներ այն բանից հետո, երբ «Վաշինգտոնի և Թեհրանի միջև Իսլամական Հանրապետության միջուկային և հրթիռային ծրագրերը սահմանափակելու վերաբերյալ նախնական բանակցությունները» ձախողվել են։
