Միացյալ Նահանգները պատրաստ են Ուկրաինային տրամադրել անվտանգության երաշխիքներ, եթե Կիևը համաձայնի խաղաղ համաձայնագրի, որը կներառի մի շարք տարածքային զիջումներ։ Այդ մասին հայտնում է բրիտանական Financial Times թերթը՝ հղում անելով իր աղբյուրներին։
Թերթի տվյալներով՝ անվտանգության երաշխիքներից բացի, Վաշինգտոնը նաև պատրաստ է ավելացնել Ուկրաինային զենքի մատակարարումները, եթե Վլադիմիր Զելենսկին համաձայնի տարածքային զիջումների։ Անանուն պաշտոնյաների խոսքով՝ ԱՄՆ-ի ենթադրյալ պարտավորությունները, հավանաբար, կներառեն խոստում, որ այդ երաշխիքները կարող են «արտացոլել ՆԱՏՕ-ի հիմնադիր պայմանագրի 5-րդ հոդվածը», որը վերաբերում է հավաքական պաշտպանության սկզբունքին։
Միևնույն ժամանակ, ինչպես ընդգծում է թերթը, այդ խոստումը ներկայումս թվում է «չափազանց անորոշ»։ Ամերիկացի պաշտոնյաները հայտարարել են, որ Վաշինգտոնի առաջարկը «անվերջ չի մնա քննարկման օրակարգում»։
