Իսրայելը մտադիր է Միացյալ Նահանգների հետ կնքել նոր՝ 10-ամյա ռազմական օգնության համաձայնագիր՝ պատրաստվելով ֆինանսական աջակցության զգալի կրճատմանը։ Այս մասին հայտնում է Financial Times (FT) թերթը։
Գործող համաձայնագիրը, որի ժամկետը լրանում է 2028 թվականին, նախատեսում է Թել Ավիվին տարեկան առնվազն 4 միլիարդ դոլարի հատկացում։ Պաշտպանության նախարարության գլխավոր ֆինանսական խորհրդատու Գիլ Փինհասի խոսքով՝ առաջիկա շաբաթներին սպասվող բանակցությունների ընթացքում Իսրայելը կձգտի առաջնահերթություն տալ համատեղ ռազմական և պաշտպանական նախագծերին, այլ ոչ թե ուղղակի ֆինանսական սուբսիդիաներին։
«Այս համատեքստում գործընկերությունը ավելի կարևոր է, քան զուտ ֆինանսական հարցը․ կան բազմաթիվ բաներ, որոնք համարժեք են փողին», — նշել է նա։ Նրա խոսքով՝ մաքուր ֆինանսական աջակցությունը կամ տարեկան մի քանի միլիարդ դոլարի «անվճար փողերը», որոնք Իսրայելը կարող է օգտագործել ամերիկյան զենք ձեռք բերելու համար, համաձայնագրի ընդամենը «մեկ բաղադրիչն» են։
