Եվրամիության մի շարք երկրներ հանդես են գալիս Ուկրաինայի արագացված անդամակցության դեմ․ ըստ Ուկրաինայի ֆինանսավորման նոր ճանապարհային քարտեզի՝ այն պետք է տեղի ունենա մինչև 2027 թվականը։ Այս մասին, հղում կատարելով իր աղբյուրներին, հաղորդել է եվրոպական Politico պարբերականը։
Ավելի վաղ Հունգարիայի վարչապետ Վիկտոր Օրբանը հայտարարել էր, որ Եվրահանձնաժողովի նախագահ Ուրսուլա ֆոն դեր Լայենը եվրոպական երկրների առաջնորդներին ներկայացրել է Ուկրաինայի ֆինանսավորման ճանապարհային քարտեզը, որը նախատեսում է առաջիկա 10 տարիների ընթացքում նրան հատկացնել 800 միլիարդ դոլար, ինչպես նաև արագացնել Ուկրաինայի անդամակցությունը Եվրամիությանը՝ մինչև 2027 թվականը։
«Դրանից հետո առանձնապես քննարկում չի եղել, սակայն մի շարք առաջնորդներ մտահոգություն են հայտնել Ուկրաինայի՝ ԵՄ անդամակցության վերաբերյալ»,-նշել է անունը չհրապարակված եվրոպացի դիվանագետը։
