Հարավային Կորեայի խորհրդարանը կողմ է արտահայտվել երկրի նախագահ Յուն Սոկ Յոլի իմպիչմենտին, այդ մասին հայտնում է РИА Новости-ն։
Երկրի ղեկավարին պաշտոնանկ անելու օգտին քվեարկել է 204 պատգամավոր, դեմ են արտահայտվել 85-ը։ Համապատասխան նախաձեռնությամբ հանդես էին եկել ընդդիմադիր կուսակցությունների ներկայացուցիչները, որոնք երկրի նախագահին մեղադրում են իշխանությունը բռնի զավթելու և իր պաշտոնական լիազորությունները գերազանցելու համար։ Դեկտեմբերի 4-ին նախագահ Յուն Սոկ Յոլն առանց անհրաժեշտ հիմքերի և օրենքի խախտմամբ՝ ռազմական դրություն էր հայտարարել Հարավային Կորեայում։
Նշվում է, որ այդ ընթացքում զինվորականները և ոստիկանությունը նախագահի հրահանգով փորձել են ձերբակալել խորհրդարանի պատգամավորներին, գրավել Կենտրոնական ընտրական հանձնաժողովը, խլել պաշտոնյաների բջջային հեռախոսները և արգելափակել ընդդիմադիր ակտիվիստների էջերը սոցիալական ցանցերում։
Իմպիչմենտի հաստատումից հետո խորհրդարանը ժամանակավորապես կասեցրել է Յուն Սոկ Յոլի լիազորությունները։ Նրա պաշտոնանկության հարցը քննարկելու է Սահմանադրական դատարանը։ Գործընթացը տևելու է 180 օր։ Մինչև ՍԴ-ի վերջնական որոշման հրապարակումը, Հարավային Կորեայի նախագահի պաշտոնակատար է լինելու վարչապետ Հան Դոկ Սուն։
