Ռուսաստանի կողմից Ուկրաինայում ռազմական գործողությունների մեկնարկից ի վեր զոհվել է շուրջ 43 000 ուկրաինացի զինվոր, այս մասին հայտնել է Ուկրաինայի նախագահ Վոլոդիմիր Զելենսկին իր Telegram ալիքում։Նա նաև հայտնել է, որ 370 000 զինվոր վիրավորվել է, որոնց 50 տոկոսը կրկին վերադառնում է ծառայության։ Զելենսկին նաև հայտնել է, որ Ռուսաստանը կորցրել է 198 000 զինվորի, ևս 550 000-ը վիրավորվել են:
Ռուսաստանն առայժմ չի արձագանքել Ուկրաինայի նախագահի տրամադրած այս տվյալներին։
Նախորդ անգամ Զելենսկին ուկրաինացի զինվորների շրջանում կորուստների թիվը հայտնել էր փետրվարին՝ ասելով, որ զոհերի թիվը կազմում է 31 000: Ավելի վաղ ԱՄՆ ընտրված նախագահ Դոնալդ Թրամփը հայտարարել էր, որ Ռուսաստանը հակամարտության ընթացքում ունեցել է 700 000 զոհ և վիրավոր, սակայն չէր նշել, թե որտեղից է վերցրել այդ թիվը։ Սոցիալական հարթակներում Թրամփը նաև նշել էր, որ Ուկրաինան ունեցել է 400 000 զոհ և վիրավոր։
