Արտաշատի բժշական կենտրոնում՝ տնօրեն Հայկ Համբարձումյանի ազատումից հետո նոր սկանդալ է հասունանում։ Չեն մարվել աշխատավարձային պարտքերը, հիմա էլ հին կուտակումներին նորն է ավելանում, ու այս բեռի հետ կառավարումը հիվանդանոցում լրիվ ճգնաժամային է դարձել։ Իսկ ահա տնօրենի հեռանալուց հետո Պետական վերահսկողական ծառայութունը, ասում են, ստուգումների արդյունքում հայտնաբերել է ահռելի չափերի հասնող չարաշահումներ, խոսվում է միլլիարդի հասնող չհիմնավորված ծախսերի մասին ու Կառավարությունը լուռ է։
Խիստ ուշագրավ է, որ կախիչը վատ կպցնելու և դրոշը թեք դնելու համար աղմկոտ պաշտոնանկություն արած Նիկոլ Փաշինյանը հանդուրժել է միլիարդավոր բյուջեի կորուստը, կամ օգնել և խրախուսել է, որ ՊՎԾ-ն չհանրայնացնի Արտաշատի ԲԿ-ում հայտնաբերած միլլիարդի հասնող ենթադրյալ չարաշահումներն ու յուրացումները։ Համենայն դեպս սրա մասին չկան պաշտոնական հաղորդումներ և անգամ չի պարզաբանվել տնօրենի ազատման հիմքերը։
«Առողջության իրավունք» ՀԿ ղեկավար Անուշ Պողոսյանը խոստովանեց, որ ինքն է փաստացի հասել տնօրենի պաշտոնանկությանը՝ իր ՀԿ-ին ուղղված ԲԿ-ի նամակ բողոքները, ասում է, գրության տեսքով կառավարությանը փոխանցելով ես եմ տեղեկացրել պետական կառավարման մարմիններին Արտաշատի ԲԿ-ում շուրջ 500 միլիոն կուտակած աշխատավարձի պարտքի մասին։ Մինչդեռ Արարատի մարզպետն ու Առողջապահության նախարարն են այս ԲԿ-ի գործատուն և պատվիրատուն։
«ԱՆ ՊԱԳ-ից իջած միլիոնավոր պետպատվերների ենթադրյալ փոշիացումն ու ոչ նպատակային ծախսերը, որոնք բացահայտել է ՊՊԾ-ն պիտի հայտնաբերեին այս երկու վերադաս կառույցները, մինչդեռ լռել են կամ դրսևորել են հանցավոր անտարբերություն»,- ասում է Անուշ Պողոսյանը։
Առողջապահական ոլորտի իրավապաշտպան կառույցի ղեկավար Անուշ Պողոսյանը Euromedia24.com-ի հետ զրույցում պատմեց, որ 4 ամիս առաջ Արտաշատի Բժշկական Կենտրոնի աշխատակիցները դիմել են իր ղեկավարած «Առողջության իրավունք» ՀԿ-ին աշխատավարձերի պարտքերի կուտակման բողոքով։
Իր միջամտությամբ խնդրի մասին տեղեկացվել է Կառավարությունը, Առողջապահության նախարարությունից վստահեցրել են, որ խնդիրը լուծում է ստացել։ Դրանից կարճ ժամանակ անց Արտաշատի ԲԿ-ի տնօրենն ազատվել է աշխատանքից։
«Ազատման պատճառը եղել են պարտքերն ու ՊՎԾ-ի իրականացրած ստուգումները, որի արդյունքում, դեռևս չճշտված լուրերի համաձայն հայտնաբերվել է 1 միլլիարդից ավելի չարաշահումներ, ընդ որում ասվում է, որ թաթախված են այդ փողերի պատմության մեջ և տնօրենը, որին ազատել են իր դիմումի հիման վրա, և նրա տեղակալները։ Խոսվում է նաև նյութական չարաշահումների, վառելիքի հետ կապված յուրացումների մասին, բայց չկա պաշտոնական հաղորդում»,- նշեց Պողոսյանը։
Իրավապաշտպանի խոսքով՝ Արտաշատի ԲԿ-ի տնօրենը ստացել է մինչև 1 ու կես միլիոն դրամ աշխատավարձ, ինչը մարզային բժշկական հաստատության դեպքում շատ բարձր թիվ է։ Նշեց, որ այդ աշխատավարձը տնօրենն ինքն անձամբ իրեն չի նշանակում, քանի որ հիվանդանոցը մարզպետարանի ենթակայությամբ է գործում, մարզպետարանի կողմից հաստատված վճարներով, ուստի այդ հաստիքացուցակը, նախահաշիվները հաստատվում են բացառապես մարզպետի իմացությամբ՝ համապատասխան հանձնաժողովի կողմից։
Մարզպետի հետ կիսում են պատասխանատվությունը մարզպետարանի առողջապահության վարչության պետը, ֆինանսական վարչության պետը ի վերջո։
«Ստացվում է, որ տարիներով այդ փաստաթղթերը հաստատվել են մարզպետարանի կողմից, հետևաբար մարզպետը պետք է որ տեղեկացված լիներ, թե՛ նման ֆինանսական պարտքերի, թե՛ չհիմնավորված ծախսային կուտակումների և ֆինանսական լուրջ խնդիրների մասին, ունեցող հիմնարկը չի կարող ունենալ նման ծախսային հոդվածներ։
Մարզային հիվանդանոցի համար 500-600 միլիոնի պարտքերի կուտակումով մարզային հիվանդանոցի դեպքում այո կարող է դառնալ ճակատագրական բայց նկատեն, որ կառավարություն այս ինֆորմացիան հասցնող օղակը խնամքով թաքցրել է չարաշահումների մասին բացահայտումները և հայտնի չէ ինչ շահագրգռվածությամբ։
Ունենք այսօր միլլիարդի հասնող չարաշահումներ, բայց չունենք դրա համար պատասխանատվություն կրող անձ՝ որևէ կարգավիճակում» -ասաց Անուշ Պողոսյանը։
Սոնա Հարությունյան
