ԱՄՆ պետքարտուղար Մարկո Ռուբիոն հայտարարել է, որ Վաշինգտոնը մտադիր է ընդլայնել տնտեսական ներկայությունը Կենտրոնական Ասիայում և տարածաշրջանի երկրների հետ նոր առևտրային համաձայնագրեր կնքել։ Այս մասին նա ասել է Euronews-ին՝ Ուզբեկստանի Սամարղանդ քաղաք կատարած այցի ընթացքում։
Ռուբիոյի խոսքով՝ Սամարղանդում շուրջ 300 ամերիկյան ընկերությունների ներկայացուցիչներ քննարկում են հնարավոր համաձայնագրեր, որոնց ընդհանուր արժեքը կարող է հասնել միլիարդավոր դոլարների։
Նա նշել է, որ այցի ընթացքում ակնկալվում են կոնկրետ պայմանավորվածություններ, սակայն բանակցությունների ավարտին համաձայնագրերի վերջնական ցանկն ու արժեքը դեռ հրապարակված չէին։
Համագործակցության հնարավոր ուղղություններից մեկը կարևորագույն հանքանյութերի արդյունահանումն ու վերամշակումն է։ Ռուբիոն ընդգծել է մատակարարման շղթաների դիվերսիֆիկացման անհրաժեշտությունը՝ նշելով, որ աշխարհը չպետք է որևէ ապրանքի կամ ռեսուրսի ամբողջական մատակարարման հարցում կախված լինի մեկ երկրից։
Անդրադառնալով Չինաստանի աճող տնտեսական ազդեցությանը՝ պետքարտուղարը նշել է, որ ԱՄՆ-ի ներգրավվածությունը մրցակցություն է ենթադրում, բայց չի նշանակում, որ Կենտրոնական Ասիայի երկրները պետք է ընտրություն կատարեն Վաշինգտոնի և այլ գործընկերների միջև։
Ռուբիոյի այցի շրջանակում նախատեսված են հանդիպումներ Ուզբեկստանի նախագահ Շավքաթ Միրզիյոևի, արտաքին գործերի նախարար Բախտիյոր Սաիդովի և տարածաշրջանի մյուս երկրների ներկայացուցիչների հետ։ Այցը հաջորդում է 2025 թվականի նոյեմբերին Սպիտակ տանը կայացած «C5+1» գագաթնաժողովին, որի ընթացքում հայտարարվել էր ավելի քան 25 միլիարդ դոլարի առևտրային համաձայնագրերի և ներդրումային պարտավորությունների մասին։
