Բելառուսի նախագահ Ալեքսանդր Լուկաշենկոն բելառուս գիտնականներին հանձնարարել է մշակել միջոցներ, որոնք հնարավորություն կտան արդյունավետ պայքարել անօդաչու թռչող սարքերի դեմ։ Դրա մասին նա հայտարարել է Մինսկի մարզ կատարած աշխատանքային այցի ընթացքում, որտեղ այցելել է ակադեմիկոս Օ.Վ. Ռոմանի անվան փոշենյութերի մետալուրգիայի ինստիտուտի փորձադաշտ, հաղորդում է Белта-ն:
«Այս անօդաչուների դեմ պայքարի միջոց է անհրաժեշտ։ Դա ձեր գործն է, թե ինչպես եք լուծելու հարցը։ Բայց եթե դուք խելացի եք, ինչպես պարծենում ենք, մարտունակ, առաջադեմ, ուժեղ բնավորությամբ, ուրեմն արեք։ Զրոյացրեք այդ անօդաչուները»,- հայտարարել է Լուկաշենկոն։
Նրա գնահատմամբ՝ անօդաչու թռչող սարքերին հակազդելու միջոցների մշակումը պետք է դառնա բելառուսական գիտության աշխատանքի առաջնահերթ ուղղություններից մեկը՝ ազգային անվտանգության ոլորտում։ Միևնույն ժամանակ նախագահը կոչ է արել չսահմանափակվել միայն սեփական ԱԹՍ-ների ստեղծմամբ։
«Պետք չէ մրցավազք կազմակերպել, թե ով ավելի լավ անօդաչու կստեղծի։ Այո՛, լավ անօդաչու պետք է, դրանից չես խուսափի։ Բայց գլխավորը՝ սովորել պայքարել անօդաչուների դեմ»,- ասել է նա։
Լուկաշենկոն գիտնականներից պահանջել է կողմնորոշվել կոնկրետ արդյունքի վրա, այլ ոչ թե խոստանալ հեռավոր ապագայում մշակել անհրաժեշտ տեխնոլոգիաները։ Նա նշել է, որ պետությունը պատրաստ է ֆինանսավորել պահանջված մշակումները, եթե դրանք գործնական արդյունք են տալիս։
«Արդյունք է պետք,- պահանջել է նա:- Այս այցին նախապատրաստվելիս ես մտածեցի, որ Վլադիմիր Ստեպանովիչը (ԳԱԱ նախագահության նախագահ Վլադիմիր Կարնիկը- ծանոթագրությունը՝ БЕЛТА-ի) առաջին անգամ ոչ միայն ինձ, այլև ժողովրդին կզեկուցի պետության անվտանգության ապահովման գործում իր հաջողությունների մասին։ Դա չպետք է լինի հերթական հեքիաթը, թե մենք վաղը ինչ-որ բան կանենք»։
Բելառուսի նախագահը միաժամանակ հանձնարարել է որոշել, թե ինչ անօդաչուներ են անհրաժեշտ Բելառուսին, և դրանց մշակման խիստ ժամկետներ սահմանել։ Ըստ նրա՝ բելառուս գիտնականները վերջին շրջանում էականորեն առաջ են գնացել այդ ուղղությամբ։
«Պետք է աջակցել։ Եթե մենք հասկանում ենք, որ մեզ պետք են վերջին սերնդի անօդաչուներ, պետք է իմանանք, թե որոնք են մեզ պետք։ Որոշել, թե ում ենք աջակցելու։ Եվ թող աշխատեն։ Խիստ ժամկետներում»,- հանձնարարել է բելառուս առաջնորդը։
Փորձադաշտ կատարած այցելության ընթացքում Լուկաշենկոն ծանոթացել է ԱԹՍ-ների հայտնաբերման, ուղեկցման և ոչնչացման միջոցներին, ինչպես նաև քաղաքացիական և պաշտպանական նշանակության այլ մշակումների։ Նրան ցուցադրել են ռեակտիվ արկեր, անօդաչուների համար նախատեսված ռազմամթերք, պայթուցիչներ, խառը հրթիռային պինդ վառելիք, տեղական արտադրության վառոդներ և պայթուցիկ նյութեր։
Բելառուսի նախագահը զննել է նաև զրահապաշտպան միջոցները, հատուկ հանդերձանքը, պաշտպանված ավտոմոբիլային տեխնիկան և անօդաչու թռչող սարքերը։ Բացի դրանից, նրան ցուցադրել են «Ֆիլին» երկտեղանի թռչող ապարատը՝ ավտոժիրը, որը կարող է օգտագործվել հետախուզության, դիտարկման, փոխադրման և հատուկ առաջադրանքների համար, ինչպես նաև գյուղատնտեսության մեջ։
Լուկաշենկոն ընդգծել է, որ պետական աջակցությունը կտրամադրվի նախ և առաջ կոնկրետ արդյունքների համար։ «Կատարիր և արի, ինչպես ես հաճախ ասում եմ, խնդրի՛ր ուզածդ»,- ասել է նա։
Միաժամանակ նա պահանջել է յուրաքանչյուր կես տարին մեկ վերահսկել գիտնականների առջև դրված խնդիրների կատարումը և հայտարարել է, որ պետությանը պետք չեն այն մշակումները, որոնց արդյունքը հետաձգվում է անորոշ ժամկետով։
