ՌԴ Անվտանգության խորհրդի փոխնախագահ Դմիտրի Մեդվեդևը հայտարարել է, որ Հայաստանի ներկայիս ղեկավարության՝ երկրի զարգացման ուղղությունը փոխելու որոշումը դրական հետևանքներ չի ունենա։ Նրա խոսքով՝ Հայաստանի համար ամենավատ սցենարը կարող է լինել «նոր Ուկրաինա» դառնալը։
«Հայաստանի ներկայիս ղեկավարությունը ճիշտ է համարել փոխել իր զարգացման ուղղությունը։ Վստահ եմ, որ դա նույնպես ոչ մի լավ բանի չի հանգեցնի։ Ամենասարսափելին, որ կարող է պատահել Հայաստանի հետ, նրա վերածվելն է նոր Ուկրաինայի»,- ասել է Մեդվեդևը Իրանի Իսլամական Հանրապետության պետական ռադիոհեռուստատեսությանը տված հարցազրույցում։
Հիշեցնենք, որ ավելի վաղ Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ բանակցությունների ընթացքում, անդրադառնալով ԵՄ-ին անդամակցելու Հայաստանի մտադրությանը, նշել էր, որ ԵՄ-ին անդամակցելու գործընթացի մեկնարկի մասին օրենքի ընդունումը նշանակում է ԵԱՏՄ-ից դուրս գալու հայտարարություն։ Ռուսաստանի դիրքորոշմամբ՝ Հայաստանում այս հարցով պետք է հնարավորինս շուտ հանրաքվե անցկացվի։
