Իրանի նախագահ Մասուդ Փեզեշքիանը CBS News-ին տված հարցազրույցում հայտարարել է, որ Թեհրանը պատրաստ է պահպանել Հորմուզի նեղուցով նավերի անցման վերաբերյալ պայմանավորվածությունները, եթե կողմերը գործեն համաձայնեցված սխեմային համապատասխան։
Փեզեշքիանի խոսքով՝ նավագնացության երթուղիների շուրջ տարաձայնություններն ի սկզբանե հնարավոր էր լուծել բանակցությունների միջոցով, սակայն դրա փոխարեն իրավիճակը հանգեցրել է ձեռք բերված փոխըմբռնման խափանմանը։
«Մենք շարունակում ենք հավատարիմ մնալ այս հուշագրին և պատրաստ ենք այն կատարել»,- հայտարարել է Իրանի նախագահը։
Փեզեշքիանը պարզաբանել է, որ նավերի անցման համաձայնեցված երթուղիները պետք է սահմանվեին Իրանի և Օմանի կողմից՝ նրանց համակարգմամբ։ Եթե որևէ նավ մտադիր լիներ անցնել այդ երթուղիներից դուրս, այն պետք է դա համաձայնեցներ երկու երկրների հետ։
«Եթե նրանք գործեն այս սխեմային համապատասխան, կարծում եմ, որ մենք բոլորս այն կպահպանենք»,- ասել է նա։
CBS-ի հաղորդավար Մարգարետ Բրենանը հարցրել է Փեզեշքիանին՝ կարո՞ղ է արդյոք նա երաշխավորել, որ իրանական զինվորականները կպահպանեն պայմանավորվածությունը, եթե այն ընդունվի ԱՄՆ նախագահ Դոնալդ Թրամփի կողմից։
«Ակնհայտ է, որ մենք կպահպանենք այն ամենը, ինչ պարտավորվում ենք ստանձնել»,- պատասխանել է նախագահը։
Նրա խոսքով՝ խնդիրը ծագել է այն բանից հետո, երբ կողմերից մեկը չի կատարել ավելի վաղ ձեռք բերված պայմանավորվածության պայմանները։
«Երթուղիները, որոնց շուրջ մենք պայմանավորվել էինք, պետք է սահմանվեին Իրանի և Օմանի միջև՝ նրանց համակարգմամբ՝ անցման և տարանցման համար։ Եթե նավը պատրաստվում էր անցնել այդ երթուղիներից դուրս, այն պետք է դա համաձայնեցներ նրանց հետ։ Նրանք դա չեն արել, և, ցավոք, դա հանգեցրել է առճակատման»,- հայտարարել է Փեզեշքիանը։
Իրանի նախագահը նաև մերժել է այս հարցի շուրջ շտապ որոշման անհրաժեշտությունը։ Նրա խոսքով՝ եթե կողմերը սպասեին մեկ ամիս, երթուղին ինքնաբերաբար կբացվեր ձեռք բերված փոխըմբռնման համաձայն, ինչից հետո հնարավոր կլիներ անցնել հուշագրի հաջորդ փուլերին։
«Այս կետին հնարավոր էր հասնել բանակցությունների և խնդիրների լուծման միջոցով»,- ասել է Փեզեշքիանը։
Ավելի վաղ The Wall Street Journal-ը հայտնել էր, որ ԱՄՆ նախագահ Դոնալդ Թրամփը մերժել է Իրանի առաջարկը և կարող է վերսկսել հարվածները երկրի տարածքի նկատմամբ Ամերիկայում միջանկյալ ընտրություններից հետո։
