Ալժիրը խզել է դիվանագիտական հարաբերությունները Արաբական Միացյալ Էմիրությունների հետ։ Այս մասին հայտնել է երկրի արտաքին գործերի նախարարությունը։
«Ալժիրը որոշել է խզել դիվանագիտական հարաբերությունները Արաբական Միացյալ Էմիրությունների հետ այն բանից հետո, երբ սպառվել են երկկողմ կապերը պահպանելու բոլոր հնարավորությունները»,- ասվում է ԱԳՆ հայտարարությունում։
Գերատեսչությունը չի մանրամասնել հարաբերությունների խզման պատճառները։ ԱՄԷ-ն առայժմ չի մեկնաբանել Ալժիրի որոշումը։
Երկու երկրների հարաբերությունները լարված էին արդեն ամիսներ շարունակ։ 2026 թվականի փետրվարին Ալժիրը սկսել էր ԱՄԷ-ի հետ օդային հաղորդակցության մասին համաձայնագրի չեղարկման գործընթացը՝ նույնպես չհրապարակելով պատճառները։
Դեռ 2025 թվականի հոկտեմբերին Ալժիրի նախագահ Աբդելմաջիդ Թեբունը հայտարարել էր, որ իր երկիրը լավ հարաբերություններ ունի Պարսից ծոցի բոլոր պետությունների հետ՝ բացառությամբ մեկի։ Նա, առանց երկիրը նշելու, մեղադրել էր այդ պետությանը Ալժիրի ներքին գործերին միջամտելու և իրավիճակն ապակայունացնելու փորձերի մեջ։ Reuters-ը գրել էր, որ խոսքը կարող էր վերաբերել ԱՄԷ-ին։
