Սեպտեմբերի 1-ին Գ. Վ. Պլեխանովի անվան Ռուսաստանի տնտեսագիտական համալսարանի Երևանի մասնաճյուղում հանդիսավորությամբ մեկնարկեց նոր ուսումնական տարին։
Այս ուսումնական տարին առանձնահատուկ է և հոբելյանական․ 2027 թվականին նշվելու է Պլեխանովի անվան ՌՏՀ-ի 120-ամյակը, իսկ Երևանի մասնաճյուղը կնշի իր հիմնադրման 25-ամյակը։
Նոր ուսումնական տարվա մեկնարկի առթիվ ուսանողներին շնորհավորեց մասնաճյուղի տնօրեն, պատմական գիտությունների թեկնածու, ՌԴ կրթության պատվավոր աշխատող Թամարա Վարդանյանը։
«Երևանի մասնաճյուղը պարզապես կրթական հաստատություն չէ։ Այն առանձնահատուկ միջավայր է, որտեղ միահյուսվում են հայկական և ռուսական կրթական լավագույն ավանդույթները։ Սակայն մեր գլխավոր ձեռքբերումը մարդիկ են՝ մեր դասախոսները, ուսանողներն ու աշխատակիցները», – նշեց Թամարա Վարդանյանը։
Միջոցառման պատվավոր հյուրն էր ՀՀ-ում ՌԴ դեսպանության խորհրդական, Հայաստանում ՌԴ գիտության և բարձրագույն կրթության նախարարության պաշտոնական ներկայացուցիչ Միխայիլ Վոժդաևը։
«Գ. Վ. Պլեխանովի անվան համալսարանը Ռուսաստանի առաջատար տնտեսական բուհերից է, իսկ Երևանի մասնաճյուղն այս տարիների ընթացքում ապացուցել է, որ արժանիորեն ներկայացնում է մայր բուհը և բարձր մակարդակով տնտեսագիտական կադրեր է պատրաստում Հայաստանի համար», – նշեց Միխայիլ Վոժդաևը։
Ուսանողներին շնորհավորեցին նաև Հայաստանում Ռուսական տան ղեկավարի տեղակալ Եկատերինա Անդրեևան և Երևանում Մոսկվայի տան ներկայացուցիչ Մարիա Ամարյանը։ Հյուրերը մաղթեցին ուսանողներին հաջողություններով, նոր ձեռքբերումներով և վառ հաղթանակներով լի ուսումնական տարի։
Տոնական միջոցառման երաժշտական կարևոր դրվագներից էր մասնաճյուղի շրջանավարտ Միքայել Մանուկյանի ելույթը։ Նրա կատարումները՝ Առնո Բաբաջանյանի սիրված մեղեդիների հիման վրա, տոնին հաղորդեցին առանձնահատուկ ջերմություն ու հուզականություն՝ միավորելով հայկական երաժշտական ժառանգությունն ու երիտասարդական ոգին։
Օրն ավարտվեց մասնաճյուղի ամենահուզիչ ավանդույթներից մեկով։ Առաջին կուրսեցիներն իրենց կուրսղեկների ուղեկցությամբ անցան կարմիր գորգով՝ կատարելով իրենց առաջին քայլը ուսանողական կյանքում և դառնալով մեծ պլեխանովական ընտանիքի լիիրավ մասը։
Մաղթում ենք բոլոր ուսանողներին, դասախոսներին և աշխատակիցներին հաջող, արդյունավետ և նոր ձեռքբերումներով լի ուսումնական տարի
