Սիցիլիայում գտնվող Էտնա լեռան վրա ամերիկացի զբոսաշրջիկը զոհվել է կայծակի հարվածից՝ Եվրոպայի ամենամեծ գործող հրաբուխ բարձրանալու ընթացքում։ Միջադեպը տեղի է ունեցել հրաբխային ակտիվության ուժգնացման շրջանից հետո, երկուշաբթի հայտնել են իտալացի հրշեջները, հաղորդում է Associated Press գործակալությունը։
Կանզասից 29-ամյա տղամարդը կիրակի երեկոյան կայծակի հարված է ստացել բաց, անմարդաբնակ տարածքում։ Նրան տարհանել են ուղղաթիռով, սակայն ավելի ուշ բժիշկներն արձանագրել են նրա մահը։ Զոհվածի անունը չի հրապարակվում։
Տղամարդուն հայտնաբերել են մոտ 1400 մետր բարձրության վրա՝ Ռոկկա Կապրա շրջանում։
Իշխանությունները զբոսաշրջիկների համար փակել են հրաբխի լանջերի որոշ հատվածներ՝ Էտնայի երկարատև ակտիվության պատճառով։ Հենց դա էլ պատճառ է դարձել մոտակայքում գտնվող Կատանիայի օդանավակայանի փակման՝ անցյալ շաբաթվա մեծ մասի ընթացքում։ Միաժամանակ, առայժմ հայտնի չէ՝ արդյոք զոհվածը գտնվել է այն տարածքո՞ւմ, որի մուտքը սահմանափակված էր։
Իշխանությունների ներկայացուցիչների խոսքով՝ վերջին մի քանի տասնամյակների ընթացքում Էտնայում կայծակի հարվածներից ավելի շատ մարդ է զոհվել, քան անմիջապես հրաբխային ակտիվության հետևանքով։ Հրաբխի ժայթքման հետ կապված վերջին մահացու դեպքը տեղի է ունեցել 1987 թվականին։
